Mar ïalait por u PM Modi yn sa plie paidbah noh ïa ka Shillong Medical College ha ka Jylla

Shillong, Jylliew 12 : Ka Sorkar Meghalaya ka dang ap ïa ka tarik na u Myntri Rangbahduh ka Ri ban plie paidbah ïa ka Shillong Medical College, ong u Myntri ka tnad ka Koit ka Khiah ka jylla, Bah Wailadmiki Shylla ha ka sngi Thohdieng.
Haba kren bad ki lad pathai khubor, u Myntri u ïathuh ba ka jingpynkhreh ban plie noh ïa kane ka jaka pule doktor ba nyngkong eh jong ka jylla la hap ban pynsangeh mynshwa namar ba ka ïa tyngkhuh bad kiwei pat ki prokram.
“Kumba long haduh mynta ngim pat lah ban ong lano. La arsien mynshwa ngi la dep buh ïa ka tarik, hynrei hadien pat ki la don kiwei ki kam ba kongsan, kumta la hap ban pyndam ïa ki,” u la ong ong haba kren bad ki lad pathai khubor.
Tangba u la ïathuh pat ba haduh mynta na ka liang ka sorkar jylla ka dang ïai buddien bad ka ophis u Myntri Rangbahduh ka Ri halor kane ka bynta.
“Haduh mynta ruh ngi dang ïakren bad ngi dang ap ïa ka tarik bad ka por na u Myntri Rangbahduh. Dang shen ha ka jingplie ai ka hospital nga la pynkynmaw biang ïa u Myntri ka Koit ka Khiah ka Sorkar Pdeng ba ngi dang ap ïa ka tarik bad ka por na u Myntri Rangbahduh,” bynrap biang u Myntri da kaba pynpaw ba ki khmih lynti ba shen kin sa lah ban plie paidbah noh ïa katei ka jaka pule doktor.
Ha kajuh ka por pat haba kren halor ka Tura Medical College u la ïathuh ba katkum ka jingïaid ka kam haduh mynta ka la kynjoh sha ka 95 persen ei ei. Haba kren pat halor ka rukom thung kam u la ïathuh ba ki la dep ban pynbna na ka bynta ki kam kiba donkam.