Ki dei ki shipai bajar jar, ai nam u Myntri ka Koit ka Khiah ïa kiba ai snam da ka monsngewbha

Shillong, Jylliew 12 : Ka Meghalaya State Blood Transfusion Council ryngkat bad ka Directorate of Health Services Medical Education and Research, ha ka sngi Thohdieng ka la rakhe ïa ka World Blood Donor Day 2026 ha State Convention Centre, Shillong, halor ka phang “One Drop of Humanity. Give Blood. Save Lives.”
U Myntri ka Koit ka Khiah ka jylla, u Bah Wailadmiki Shylla, haba ai jingkren kum u kongsan, u la ainam ïa ki nongai snam mon sngewbha kum ki “shipai kiba jar jar” bad kyntu ïa ka tnad ka koit ka khiah ba kan pynleit jingmut kyrpang sha ki samla ka jylla.
“Ki nongai snam mon sngewbha ki dei ki shipai ba jar jar kiba pyllait im ïa shibun ki mynsiem briew. Kane ka pyni ba ki paidbah paidbah ruh ki lah ban wanrah ïa ka jingkylla kaba khraw,” ong u Shylla.
Da kaba kdew ba 51 persen na ka jingdon briew ha Meghalaya ki dei kiba hapoh 25 snem ka rta, u Myntri u la bthah ïa ki ophisar ba kin pynheh ïa ki prokram jingïalap jingtip paidbah. “Nga bthah ïa baroh ki ophisar ka koit ka khiah bad ki program officer ba kin pynïar ïa ki jingïalap jingtip sha ki skul, kolej bad ki jaka paidbah khnang ban pynshlur ïa ka pateng samla,” u la ong.
Ban pynjanai bad pynïaid katkum ka juk stad teknoloji ïa ka rukom ai snam, u Myntri u la ai jingmut ban thaw da ka mobile app kaba lah ban pyndonkam na ka bynta ka jingregister ïa ki nongai snam sngewbha bad ban pyni paidbah ïa ka jingdon jong ka snam ha ki blood bank. “Phi ym donkam ban long doktor lane nongtrei ha ka kam sumar ban pyllait im ïa ka jingim briew. Phi lah tang da kaba ai sngewbha ïa la ka snam ban pyllait im ïa kiwei,” la ong u Myntri.
Ka Dr. L Mylliemumlong ba dei ka Director DME, ka la ban jur ba ka jingai snam ka dei ka jingkitkhlieh paidbah. “Nga kyrpad ïa ki paidbah ba kin shim ïa ka jingai snam mon sngewbha kum ka jingkitkhlieh paidbah. Ka rukom ai snam ka long kaba shngain pura,” ka la ong.
Katba na ka liang u Additional Director DME, S. Lyngdoh, u la ong ba ka jingai snam mon sngewbha ka dang long ka lad kaba shngain tam ban pynbiang ïa ka jingdonkam snam. “Ym lah ban thaw da ki kor ne da ka teknoloji ïa ka snam. Ka jingai snam mon sngewbha khlem da siew pisa ka dei ka rukom kaba shngain bad kaba neh slem tam ban pyndap ïa ka jingdonkam ha ki jingïa paidbah, ka jingsumar cancer bad ki jingjia kyrkieh,” u la ong.
Ha kane ka sngi, la sam ïa ka Lifetime Achievement Award sha ka Deborah Anne Shylla bad la pynkup burom ruh ïa ki nongai snam ba dang sdang ha ka sien nyngkong.
La ai jingïaroh ruh ïa ki blood centre jong ka Dr. H.G. Roberts Hospital, Nazareth Hospital, NEIGRIHMS bad Pasteur Institute Shillong na bynta ka jingshakri jong ki.