Khliehriat, Jymmang 29: Ha ka jingaikynduh lang ki riew rangbah kiba na ri lum Jaiñtia hynnin ka sngi, kiba dei ki nongkhaiï kiba ju im da kaba tih maw bad tih shyiap, ki la seng ïa kawei ka kynhun ba la tip kum ka Jaiñtia Minor Minerals Miners’ Association (JMMMA) bad ki nongialam jong kane ka kynhun ki la pynpaw ka jingsngew khia halor ka jingkhanglad ka sorkar ban tih maw bad tih shyiap.
Ha ka jingiakynduh lang jong kitei ki riew rangbah la jied ruh ïa ki nongkitkam kiba kynthup, u President, u bah Kyrmiki Dkhar, Vice President, u bah Firstly Syad lem bad ki dkhot, kitei ki nongialam bad ki dkhot kila iakren halor shibun ki jingeh ba ki ïakynduh kiba na ka daw ka jingshah khang ban tih maw bad tih shyiap ha ka jylla.
Kum ban shu bynrap, ka sorkar jylla mynta ka la pyntreikam da ki kyndon aiñ ki ba long peitngor bad bishar bniah ïa ka rukom tih maw bad tih shyiap hapoh ka jylla kiba la tip kum ki ‘Minor Mineral’ ka sorkar ka la pyntreikam da ka ‘Meghalaya Mineral Concession Rules 2016’ kaba kdew shai ba kino kino ki pyntrei ïa ka kam tih maw, tih shyiap ki dei ban don ka Quary Permit, ka Mining Lease bad ka syrnot Environment Clearance kaba hapoh ka ki kyndon aiñ jong ka Environment Protection Act 1986.
