Shim bynta ka shnong Panaliar ban leit pynkhuid ïa ki ñuit ba neh sah ha ‘Syntu Ksiar’

Jowai, Jymmang 29: Hadien ka jingwan u slap ba jur uba la tap lut ïa ki rud jong ki bynta ka Syntu Ksiar (wah Myntdu) kaba la pyndap bad pynsniew dur da ki jaboh jabaiñ kum ki Plastic bad kiwei de ki jakhlia ba bun.
Na ka liang ka Dorbah Shnong Palaniar ha ryngkat ka jingïatreilang bad ka Panaliar Tourism & Environmental Development Society, hynnin ka sngi Saitjañ kila leit hiar pynlong ïa ka jingpynkhuid bad ban pynlum pynlang ïa ki ñiut ki ñier ha shi lynter ki bynta ka ‘Syntu Ksiar’ kaba dei ruh kawei na ki jaka shangkai pyngngad kaba khriang ïa kiba bun ba lang.
Ïa kane ka jingpynkhuid la ïalamkhmat da u General Secretary ka shnong ma Careme Phawa da ka jingïashim bynta lang naduh ki nongïalam shnong, ki khun samla shynrang kynthei lem bad ki hep barit kila wan shim bynta shongshit ban wanrah biang ïa ka jingkhuid jingsuba.
Hadien kane ka jingpynkhuid la don ruh ka jingai bam ruh ïa ki dohkha ha ka Wah Myndu (Syntu Ksiar) ha kaba u Waheh Shnong ma Requama Rq. laloo ula ai khublei ïa ki khun ka shnong kila la wan ban ïasnohkti lang ha kane ka sngi namar katei ka jaka ka dang hap hapoh u pud ka shnong.
Ula kyntu ruh ba ym dei ban khwai dohkha khamtam ha kitei ki bynta ba la pynlong ‘Fish Sanctuary’ da ka Jaiñtia Fishing & Environmental Association ha Syntu Ksiar. Na ka liang ka shnong ruh kala maham bad pynshitom ïa kiba leh pyrshah. U ma Laloo ula ong ba dang ha kine ki sngi ba wan u slap ki bynta ka wah kila heh shaba palat wat ki dohum kiba poi lut sha ki wah duid bad ki don ki briew kiba la shim kabu ban tong sisi ïa kitei ki dohum.
Haba pyntkut ïa ka jingkren u Waheh Shnong ula ai khublei ïa baroh bad kymjuh ïa ka Panaliar Tourism & Environmental Development Society, kumjuh ki ki saheh jong ka tnad Soil kiba la pynshna pynbha ïa katei ka jaka bad pynneh pynsah ïa ki dohum dohwah, ki mrad ki reng bad ban ïada ïa ki sawdong sawkun jong ka mariang.