Dawa ka EJNC na ka sorkar ba dei ban maramot noh mardor ïa ka jingkieng ïaid kali ha Shymplong

Khliehriat, Jymmang 29: Ka East Jaiñtia National Council (Central Executive Council) lyngba u kyrwoh na u General Secretary u bah Nangjan Dkhar, ka dawa na ka sorkar jylla ba ka dei ban phah maramot noh mardor ïa ka jingkieng kaba don ha shnong khappud hajan Shymplong, namar ka jingjulor katei ka jingkieng ka la buh jingeh ïa ki paidbah kiba sah sha ki thaiñ khappud kiba ju iaid lyngba na katei ka jingkieng.
Ka seng ka dawa ruh na ka that PWD ba kan shim khia kham kloi ban maramot ïa ka jingkieng kaba khlem maramot mynta la kumba shi bnai tam.
Ka seng ka pynkynmaw biang ruh ba katei ka jingkieng ( RCC Bridge No 54/1), kaba don hajan ka shnong Shymplong kaba la shah rong noh ha ka um myn ha ka 17 tarik u iaiong ka dei ka jingkieng kaba don ha ki thaiñ khappud kaba ym pat shym la sdang satia ban pyntrei haduh mynta la don kumba shi bnai tam, ïa katei ka jingkieng ka um ka la rong lut ploiñ bad kane ka la buh jingeh haduh katta katta ïa ki paidbah ka thaiñ ha ka leit ka wan khamtam eh ha ka pang ka shitom bad ha ka kit ka bah namar ka dei tang kane ka jingkieng kaba pyniasoh ïa kiba bun bah ki shnong ha ki thaiñ khappud ha East Jaiñtia Hills District.
“Kumba la paw ha ki pathai khubor la ong ba nongshong shnong jong ka shnong Shymplong bad ki shnong ba mar jan ki iathuh ba lada ki donkam bad leit sha Khliehriat, sha Umkiang ki hap ban iaid da ka kjat na kawei ka jingkieng ïaid kjat (Hanging Bridge) kaba don ha ka wah Lukha tat haduh ba kin da poi ha surok national highway ha Sonapyrdi, la ong ruh ba naduh ba julor katei ka jingkieng ym don kali shuh ki ban wan bad leit sha ki shnong khappud kiba dei iaid lyngba na katei ka jingkieng kiba kynthup ka shnong Huroi, Hingaria, Lahaleiñ, Lejri bad kiwei kiwei ki shnong.
Kum ban shu phai dien, ka jingkieng kaba don ha Shymplong ka shah rong noh ha ka um naduh myn ha ka 17 tarik u iaiong, ha ka jingshisha, ki Engineer jong ka tnat Public Work Department mar mar ha ki sngi ba bud ki la leit ban jurip bad na ka liang ka sorkar ruh ka la rai ba yn sa phah jurip (examin) bha ïa katei ka jingkieng ha khappud bad wat u Symbud Kongsan jong ka jylla, u bah Prestone Tyngsong ruh u la kular ban shim khia ïa kane ka kam, hynrei kaba sngew phylla pat ba wat haduh mynta la don kumba shi bnai tam ïa katei ka jingkieng ym pat shym maramot bad wat tang ki tiar ki tar ban maramot ruh ym pat shym la pynpoi, kane ka la buh jingeh shisha ïa ki paidbah ka thaiñ khappud namar kam dei kaba suk ïa ki nongshong shnong ka thaiñ ban kiew ban hiar ïa ki riat lem bad ka kit ka bah ban ïaid lyngba na ka jingkieng iaid kjat kaba don ha ka wah Lukha, kane ka buh jingeh khamtam eh ïa kito kiba pang ba shitom, namar watla ka dei tang ka jingkieng kaba rit hynrei ka dei kawei na ki jingkieng ba kongsan ha ka thaiñ khappud.
La ong ruh ba na ka liang ka seng kan sa nang bud dien halor kane kaba long na ka bynta ka jingbit jingbiang ki paidbah ha ki thaiñ khappud.