Nongpoh, Lber 07: Ki pynthor kba ha ka them Ri Bhoi ki la ai jingmyntoi shisha shibun eh ïa ki nongrep ka Ri Bhoi District bad lah ruh ban ong ha kiwei kiwei ki district ka jylla ha kaba nalor ba ki la ioh jingmyntoi na ka jingrep ïa u kba ban pyndap ja ha ïing ha sem bad hadien ba ki la dep ot ne lum ïa u kba ki la ioh ruh sa ka lad ban kamai kajih da kaba thung ïa ki jhur ki jhep ha ki pynthor kba.
Haba kheiñ kyllum lah ban ong ba ym dei tang ha Ri Bhoi District ba bun ki nongshong shnong ki kyrshan ïa la ka ïing ka sem da ka kam rep ka kam riang bad wat ha ka jylla hi baroh kawei kiba bun ki dei kiba im da ka kam rep kam riang lait noh tang katto katne kiba don ha ki kam sorkar bad kiba im da ka kam khaïi pateng.
Haba kren halor ka kam rep ka kam riang, ka jylla Meghalaya khamtam ka them Ri Bhoi ka dei kawei na kaba seisoh bad bun ki paidbah ki im tang da ka rep ka riang.
Kumba paw ha Ri Bhoi District, ka jingdon ki pynthor kba ka la ai jingmyntoi shiben eh ïa ki nongrep bad ka daw ka long ba nalor ba ki rep ïa u kba uba ki pyndap bam ïa ka ïing ka sem bad hadien ba la dep ot ne lum ïa u kba ki la ioh ruh wat ban thung ïa ki jhur ba bun jaid ban kyrshan pat ïa ka ïing ka sem da kaba die ïa ki mar rep ba ki rep sha ki ïew ki hat.
La sakhi ruh tang hadien ba la dep lum ïa u kba, ki nongrep ki la sdang biang ban puh ban daiñ ha ki pynthor kba ban rep ïa ki jaid jhur naduh u Sohsaw, u Kubi, u Presbin, u sohmynken, u Kajor bad kiwei kiwei bad lada don lei lei ka iew ka hat ne ka dor jong ki mar rep kiba bun ki nongrep ki ioh shisha ka jingmyntoi na ka kam rep ka kam riang.
Ha kine ki sngi, la ïohi ruh jan baroh ki pynthor kba la sdang khielum ki jaid jhur bapher baher ba la rep da ki nongrep bad sa tang katto katne por ki la ioh ban kheit ïa ki jhur ban die pat sha ki iew ki hat.
Haba kheiñ kyllum pat kat kum ka sur ba mih na ki nongrep, ka jingeh kaba ki ïa kynduh hakhmat eh nalor ba ki la rep shitom, ka dei ka jingbym don ka dor jong ki jhur ki jhep ha ki iew ki hat ba ki hap ban die tad bad bunsien ka dor jong ki mar rep ba pynmih da ki nongrep kim don dor ka dei kawei na ka daw ka jingwan tuid jong ki jhur ba wan na shabar ka jylla.
Kaei kaba ki nongrep ki angnud, ka long ba ka sorkar jylla ka dei ban phai khmat kyrpang sha ki nongrep da kaba pynioh ïa ka iew ka hat kaba biang bad lada don hi ka dor ka mur jong ki mar rep, ki paidbah ka jylla khamtam ki nongrep ki long kiba riewspah shisha tang da ka kam rep ka kam riang.
