Khlem treikam ka CSD bad kam pynroi ha Western Ri Bhoi

Nongpoh, Lber 07: Haba phai dien biang sha ka Election jied nongmihkhmat kaba dang shu dep shen hapoh ka jylla ba ki paidbah ki la dep ban ai ïa ka rai ha man la ki Constituency ha ka jylla bad haba phai sha Ri Bhoi District hapoh ka Jirang Constituency ka long ka election kaba kham pher ha kaba ki kam pynroi ba la wan rah da u MLA kaba la ai jingmyntoi shibun eh kam treikam satia ha kaba lada um lah ban khur bun ka vote na ka GS road ha ka thaiñ Byrnihat u la jan sha pynrem kylla ha u kyrtong ka Party Congress.
Kumba paw pyrthei hapoh ka san snem ba ki MLA na Ri Bhoi ki la mihkhmat ïa ki san tylli ki Constituency ba kynthup ïa ka Umroi, Umsning, Mawhati, Nongpoh bad Jirang Constituency bad haba phai sha ki kam pynroi ka Jirang Constituency ka dei kawei na ka Constituency kaba u Bah Sosthenes Sohtun u la wan rah shibun ki jingkylla kiba la ai shisha ka jingmyntoi ïa ki paidbah ka Jirang Constituency.
Ki katto katne ki kam pynroi ba la wan rah da u Bah Sosthenes Sohtun kum u MLA ka Jirang na ka bynta ka Western Ri Bhoi ki kynthup ïa ka surok rong na Mairang sha Rani, ka surok rong na Umrit sha Umling, ka suork PMGSY na Patharkhmah sha Warmawsaw, ka surok PMGSY na war Mawsaw sha Mawdem, ka surok rong na Killing sha Umtyrnga kiba dei ki surok kiba la shah iehnbein la bun phew snem mynta.
Ki kam pynroi ba kham khraw shuh ba la wan rah da une u MLA ka dei ka jingkyntiew kyrdan ïa ka Administrative Unit sha ka Civil Sub Division ha Patharkhmah, ka jingkyntiew kyrdan ïa ka Police Outpost sha ka Police Station, ka jingwan rah ïa ka Model Degree College ha Patharkhmah, ka Eklevia Residential School bad kymmjuh ruh ka jingkyntiew kyrdan ïa ka Tasku Health Sub Centre sha ka PHC bad ka jingkyntiew kyrdan ïa ka Byrnihat PHC sha ka CHC, hynrei haba phai pat sha kane ka election kaba dang shu dep shen la paw shai ba kitei ki kam pynroi bad ki jingkylla ba la wan rah da utei u MLA kim da treikam khamtam ha Western Ri Bhoi u ioh duna bha ki Vote ha kaba lada um khlaiñ ki vote na GS road jong ka thaiñ Byrnihat kan poi wat sha u pud ban shah pynrem khlem da treikam satia kitei ki kam pynroi..
Kine ki long ki kam pynroi bad ki jingkylla ba la wan rah da u Bah Sosthenes Sohtun kum u MLA ka Jirang tang hapoh ka san snem bad dang don kiwei kiwei ki kam pynroi kum ka jingsam tin sha ki longing baduk bad kiwei kiwei, hynrei kaei kaba la pynduh mynsiem ïa u na ka thaiñ Western Ri Bhoi ka dei kaba u hap ban mad ïa ka jingshet kylla ki paidbah khlem da burom ïa kitei ki kam pynroi ba u la wan rah tang hapoh ka san snem kata hadien ba u la jop ha u snem 2018 haduh 2023 bad ha kane ka kynti ruh u la shah jied biang kum u MLA da ka jingkyrshan radbah ki paidbah na ka thaiñ GS Road, Byrnihat.
Kitei ki kam pynroi ba ki paidbah ki la ioh jingmyntoi khamtam ha Western Ri Bhoi ba hap ha ka Jirang Constituency kim treikam satia, ka la paw hadien ba la pynbna ïa ki vote ba la ai jingkyrshan da ki paidbah ha kaba ha Jirang Constituency ki don haduh 8 ngut ki kyrtong ba kynthup ïa u Bah Sosthenes Sohtun u la ioh khur 12690 vote, bud sa u kyrtong ka party Congress, u Bah Adrian L. Mylliem uba la ioh khur 11067 vote, bud sa u kyrong ka UDP, u Bah Badhok Nongmalieh, uba la ioh ban khur 4107 vote, bud sa u kyrtong ka TMC, u Sunmoon Marak uba la ioh khur 3928 vote, bud sa ka kyrtong ka BJP, ka Riya Sangma kana la ioh khur 2075 bad sa U Forcasting Nongrang kyrtong shimet ba la ioh khur 268 vote, bud sa u Lee Trevor Bareh kyrtong shimet uba la ioh khur 226 vote, bud sa ka Serimina Marak na ka party RPI kaba la ioh khur 175 bad NOTA 315 vote.
Haba kheiñ kyllum, u Bah Sosthenes Sohtun u la ioh ban khur 12690 vote ba u la poi sha ka thong ka jingjop bad u kyrtong ka Party Congress u la ioh khur 11067 bad lyngba kitei ki vote u Bah Sohtun u la jop tang lyngba ka Margin kaba 1623 vote pyrshah ïa u kyrtong ka Congress kaba paw shai ba ki kam pynroi kiba u la wan rah kim treikam kam na ka bynta ki paidbah ka thaiñ Western Ri Bhoi kiba ioh bun bha ki kam pynroi bad ki jingmyntoi kiba la wan rah da u Bah Sosthenes Sohtun kum u MLA tang hapoh ka san snem kata naduh ka 2028 haduh ka 2023 ba la poi sha ka jingpynthymmai biang ïa kita ki Nongmihkhmat.
Shuh shuh, lada kheiñ kyllum ki kam pynroi ba la wan rah da u Bah Sosthenes Sothun ha Jirang Constituency tang hapoh ka san snem ka la poi sha ka T.600 klur duna bad lah ruh ban ong ba ha Ri Bhoi District u dei uwei na u MLA uba la wan rah bun tang ki kam pynroi hapoh ki Constituency katba ka Wwestern Ri Bhoi kaba la ioh bun ki kam pynroi ki duna ki paidbah ba ai jingkyrshan kumba la paw lyngba ki vote ba la dep kyrshan da ki paidbah bad ka jingjop kaba u Bah Sosthenes Sohtun u la jop ka dei hi ka jingkyrshan ba radbah jong ki paidbah na ka thain G.S Road ha Byrnihat shaduh Khanapara.