Shillong, Lber 07: Ka jingbam sami jong u Myntri Rangbah jong ka jylla u Conrad K Sangma ha ryngkat ki kynhun myntri jong u lah ban sakhi ba ka la long ka sngi kaba ki Myntri lah ban ïohi ba ka la kylla kum ka sngi kaba ki nongsaiñ pyrthei ki pynpaw pyrthei ba ka dei ka sngi jingduwai kaba bun sien tam namar ha kane ka sngi na ka liang ki myntri ki la duwai haduh ar sien syndon.
Lah ban ïohi ba ha kane ka sngi na ka liang ka kynhun Myntri ka la pynlong shuwa da ka jingïaduwai lang ha ka ïingsah u Myntri Rangbah ha kaba u Archbishop Victor Lyngdoh jong ka Jylla Niambah Shillong ha ryngkat ka jingdonlang u Vicar Genral ka Jylla Niambah u Rev Fr Richard M Majaw u la synran lang ïa kane ka jingduwai u Archbishop na bynta ka Kynhun Myntri shuwa ba kin leit bam smai ha ïing u Lat.
Shuh shuh hadien ba la dep bam smai la ïohi ba kane ka Kynhun Myntri jong ka sorkar MDA II la ïohi biang ba ka pynlong biang ka jingduwai ha kamra u Myntri Rangbah ba la ïalam da u Rev B Wankhar jong ka Balang Presbyterian.
Lah ban kdew hangne ba ka Kynhun Myntri jong ka MDA I ha u 2018 ruh ka la pyndem shuwa ïa lade ha ka jingduwai shuwa ban shimti ïa ka tnad kaba ki shah bynshet.
