Pynbeit u Myntri ïa ka jingthut ka rukom pynpoi marbam sha ki 3 tylli ki Distrik na ka Nongstoiñ FCI Depo

Shillong, Nailur 21: U Myntri ka tnat Food and Civil Supplies ka sorkar Jylla, Bah Methodius Dkhar hynne ka sngi Nyngkong u la pyntip ba ka jingpynsangeh ban pynpoi marbam sha ka thaiñ West Khasi Hills kaba la neh la kumba shi bnai, namar ka jingpynsangeh ïa ki trok ban leit sha ka FCI depot ha Pyndengrei, ka la dei ban kut noh, hadien ba ki wholesaler ki la mynjur ban shim ïa ki marbam na Shillong.
Ïa kane u Myntri u la ïathuh hadien ka jingïalang ban bishar ïa kane ka jinglong-jingman bad ki wholesaler jong ki distrik West Khasi Hills, Eastern West Khasi Hills bad South West Khasi Hills, ryngkat bad u Deputy Commissioner ka West Khasi Hills bad ki ophisar jong ka FCI bad ka tnat Food and Civil Supplies kaba la long ha kane ka sngi Nyngkong.
“Ha u bnai ba la dep, ka la don ka jingthut ha Pyndengrei FCI godown ha Nongstoin, na kaba ngi ju pynpoi marbam sha ki lai distrik. Kumta ngi la bthah ïa ki wholesaler ban shim shipor ïa ki marbam na Shillong bad Sohryngkham,” ong u Myntri haba kren bad ki lad pathai khubor.
U la ïathuh ruh ba ki wholesaler jong West Khasi Hills ki la pynpaw ïa ka jingkhuslai halor ka jinglut kaba bun ban leit kit ïa ki marbam bad ka jingjngai jong ka lynti.
“Mynta ngi la ïakren bniah bad ngi la kyrpad ïa ki ban shim ïa ka bhah jong u Nailur na Shillong, Sohryngkham, lane wat na Williamnagar lada ka khamjan. Ki la mynjur ban shim ïa ka bhah kaba dang sah ha kane ka taïew,” u la ong.
U Myntri u la ong ba ki nongshong shnong kin ïoh noh ïa ka bhah jong ki shen, namar don ki jaka kiba kim shym la ïoh marbam la kumba shi bnai namar ka jingeh kaba la mih.
Haba batai ïa ka daw jong kane ka jingeh, u Myntri u la ong ba ka Dorbar Shnong ka la pynpaw ka jingpyrshah ïa ka jingpyndonkam ïa ka surok kaba pynïasoh sha ka FCI depot da ki trok kiba heh.
“U Rangbah Shnong bad ka committee ki la sngew ba ki trok kiba heh kin pynjulor ïa ka surok na ka surok bah sha ka depot ha Pyndengrei. Ki la don ki jingpyrshang na ka PWD bad na ka tnat jong ngi ban pynthikna ba yn pynneh ïa ka surok, hynrei ka jingsngewkhia ka dang sah bad la pynsangeh ïa ki trok. Kane ka dei ka daw kaba kongsan,” u la ong.
U la bynrap ba ka tnat ka dang ïakren bad ka dorbar shnong ban maramot bad pynbha ïa ka surok, khnang ban lah ban pynïaid biang ïa ka jingpynpoi marbam sha Pyndengrei.