Nalor ka jinglong phylla ka jaka bad ngeit ban pynkoit ïa ki jingpang

Nongpoh, Rymphang 19: Kum kawei naka jingangnud ban don ki jaka shongkai pyngngad bad shong jah thaid ba ki paidbah kin ioh ban pynlut por khamtam haka por ba ki duna kam ne ka por shuti, uwei u rangbah naka shnong Patharkhmah u la sdang ban pynpaw pyrthei da ka Jagubura Lake kum kawei naki jaka shong jah thaid ne shang pyngngad ba ki paidbah ki lah ban pynlut por haka shnong Barigang Patharkhmah.
U tei u rangbah u ba la sdang ban pynpaw pyrthei ïa katei ka jaka kaba itynnad u dei u Bah Oral Syngkli u ba la don kumba 60 snem ka rta bad hapdeng ka jinglong rangbah u don ka jingangnud ban thaw bad pynwandur ïa katei ka jaka kum ka jaka ba ki paidbah ki ioh ban shangkai pyngngad, namar kumba long mynta ha ka thaiñ Patharkhmah bad kiwei ki shnong ba marjan kim don jaka shangkai ne pynlut por.
Nalor ka jingpynpaw pyrthei ïa katei ka jaka kum ka jaka shangkai pyngngad, katei ka jaka ka don ruh ka jinglong phylla naka kyrteng bala jer iaka kum ka Jagubura ha kaba katkum ka khana bala don uwei u tymmen haki por ba mynshuwa u ba shong ba sah ha katei ka jaka bad u ba lah ban sumar ïaki jait jingpang bapher bapher naduh kiba pang ksuid, bad haduh mynta mynne u don ruh u maw ba ki jaitbynriew Rabha ki ju leit ban nguh ban dem ban koit naki jait jingpang jong ki bad kaba kham phylla la ong ruh ba ki jem shisha bad haduh mynta mynne ka dang don ruh ka jaka sumar briew da u tei u rangbah u ba don ka sap kyrpang ban ïathuh lypa wat ki jingpang ba don haka met u briew da kaba buh ruh ka Colony.
Haba kren bad u nongthoh khubor, u Bah Oral Syngkli u la pynpaw ba kum u rangbah u la iohi bad sdang ïa katei ka kam dei hadien ba bun naki nongtrei, ki paidbah bad ki samla kim don jaka shongkai pyngngad lane ba kin pynlut ïaka por jong ki, kumba ka thaiñ Patharkhmah ka dei kawei naki jaka kaba la sdang ban kiew sted haka roi ka par, hynrei da ka jingai mynsiem jong ka seng Samla Patharkhmah u la sdang ban pynpaw pyrthei ïa katei ka jaka mynta la kumba shi bnai naduh bala plie paidbah ïaka.
“Nga dei u briew u ba sngewtynnad ban shangkai sha kiwei ki jaka bad haba nga leit nga wad ruh ki jaka ban ioh shong jah thaid, bad dei na kane ka daw bala pynlong ïanga ban sdang ban pynwandur ïa kane ka jaka kaba dei ka pung dohkha haki por ba mynshuwa kum ka jaka shongkai pyngngad ki paidbah ha kaba kila don ruh ki jaka shongkai bala shna kyrpang, ki dukan bam,” la ong u Bah Oral.
Utei u rangbah u la ïathuh ruh ba u don ka sap kyrpang ban peit lane ban ïathuh lypa ïaki jingpang haka met u briew ba wat ki mashin haki hospital ki shem jingeh ban lap, bad kumba long mynta u sumar ruh ïaki briew bad wat ki heh ki haiñ kiba leit ban phah sumar ha katei ka jaka ban pynkoit ïaki jait jingpang bad wat ki jingpang ba kham heh kum ka Cancer, khie bhur, pang ring, lamwir bad kiwei kiwei.
U la ïathuh ruh kumba long mynta ki paidbah kila sdang ban tuid sha katei ka jaka wat kiba na kiwei ki jaka ba marjan katei ka shnong ban leit shongkai pyngngad bad pynlut por.