Mawkyrwat, Rymphang, 19: U Nitin Gadkari, Union Minister jong ka Roads, Transport bad National Highway jong ka Ri India, ha ka sngi saitjaiñ jong ka taïew u la hiar sha shnong Khonjoy kaba dei ka shnong hapoh ka Ranikor Constituency ban ïalap elekshon na ka bynta u Martin M. Danggo uwei na ki kyrtong ka Bharat Janata Party (BJP) ïa kaba kum ka party ka la dep ban pynïeng ha kane ka MLA Election 2023 sha ka Ïingdorbar Thaw-aiñ jong ka Jylla Meghalaya.
Haba ai jingkren ha ka jingïalang, u Nitin Gadkari, Union Minister jong ka Roads, Transport bad National Highway jong ka Ri India, nyngkong eh u la pynpaw ka jingsngewkmen ban ïoh kane ka kabu ban wan ïuhkjat ha kane ka jaka kaba don ïa ki khlaw ki btab kiba itynnad bad kaba don ha ka ïa ka lyer kaba suhsieng. Ha kaba ïa dei bad u kyrtong jong ka BJP na ka Ranikor Constituency uba dei ruh u myntri jong ka tnad surok ha ki snem kiba la dep, u Martin M. Danggo, na ka liang u Nitin Gadkari u la pynpaw ba une u long shisha u nongïalam ha kaba ma u lem bad u Danggo ki la ïoh ban ïa tai ha ki snem kiba la dep halor kumno ban wanrah ki surok kiba bha ha kane ka dong ka thaiñ.
Namarkata, u la ong ruh ba khlem ki surok kiba bha kan nym lah ban wanrah ki jingkylla lyngba ka roi ka par bad lada ha ki shnong ki thaw ki don ha ka jingseisoh ha kiba bun ki bynta kata ha ka rep ka riang bad kiwei de ki kam hynrei khlem ka surok kum kin lah ban pynïaid ïew ïa kita ki mar bad kane ruh ka dei kawei na ki jingkylli kiba khraw bha.
U la pynsngew ruh ba hapoh ka Minister jong ka Roads, Transport bad National Highway ka dei kawei na ki history hapoh jong ka Ri India ba lyngba ka jingïalam jong u Myntri Rangbah-duh jong ka Ri India, u Narendra Modi, ka Northeast ka dei kawei na ki bynta ba kan ïoh ban pyntrei kham bun eh ki surok kaba kot haduh ki klur tyngka bad lyngba ka jingdon jong ki surok kiba bha yn lah ban wanrah ïa kiba bun ki bynta kiba lah ban long ka jingïarap ïa ki shnong ki thaw bad ban rad-dyngkhong ruh ïa ka jingduk.
U Nitin Gadkari u la pynsngew ruh ba ha kaba ïa dei bad ki jingshna ïa ki surok, kum u Myntri Rangbah ba dei peit ïa ki kam surok u pynpaw ba kam don jingeh ha kaba ïa dei bad ka pisa tyngka hynrei ka jingeh ka long ban ïoh ïa ki jaka ne ka jingmynjur ïa kiba bun ki liang namar ban shna ïa ki surok la hap ban don ka jingduh nong jong kiba bun ki jaka bad lada ym ïoh ka jingmynjur ka eh ban pyntreikam. Kumta u la kyrpad ba kum ki paidbah ki dei ban don ka jingïatreilang ha kane ka bynta khnang ba ki jingthmu ban pynïoh ïa ki surok kiba paka kin long kiba ïaid beit.
Ha kaba ïa dei bad ki surok bah, u Nitin Gadkari ula ïathuh ba na ka liang ka Minister jong ka Roads, Transport bad National Highway ka la dep ban bhah ha ka Jylla Meghalaya shwa u snem 2014 haduh 1294 km ki surok bah ne ki National Highway bad la bhah khyndiat ka mang pisa lyngba ka Central Roads Fund (CRF) ha kaba haduh mynta u snem 2023 na ka liang ka Ministry ka ladep ban pynkiew ban shna ïa ki surok bah sha ka 324 km hapoh 8 snem kaba la pynkiew haduh 25% ki surok bah hapoh ka Meghalaya.
Ha kane ka sngi u la ïathuh ruh ïa ki katto katne ki bynta kiba ïa dei ki jingshna ïa ki surok kiba hapoh ka Jylla Meghalaya bad kham kyrpang kiba dei hapoh jong ka South West Khasi Hills District kata ka surok bah na Ranikor sha Baghmara ha ka jingmang pisa kaba T. 1300 klur ha kaba ïa kane la don ka thong ban pyndep shwa u Risaw, 2024 bad ki san bynta kiwei de ki surok kiba hapoh jong kane ka projek kiba la bhah bad ka por ban pyndep ïa ki bad kumjuh ruh ïa ka surok na Nongstoiñ sha Wahkaji kaba 43 km ha ka jingmang kaba T. 302 klur kaba la mang ban pyndep shwa u ‘Nailar, 2023.
Ha kaba ïa dei bad ka surok bah na Lad Mawreng – Weiloi sha Mawkyrwat kaba jngai 107 km kaba dei ruh ka pdeng jong ka South West Khasi Hills District bad ka surok na Wahkaji – Ranikor lyngba ka Langpa ba kynthup ruh ïa ka jingkieng kaba 150 m ka jingkieng bad ka jingjngai kaba 30 km kiba dei ka surok kaba donkam tam, u Union Minister jong ka Roads, Transport bad National Highway jong ka Ri India, u Nitin Gadkari u la pynpaw ba ïa kine wat khuslai hynrei ma u un sa leh ïa la ka jong ka bynta nangne shakhmat.
Namarkata, u la buh ka jingkyrpad ba lada ki paidbah ki ai jingkyrshan ïa ka BJP shibun ki jingkylla bad ki jingeh yn lah ban weng, hynrei ki don pat kiba pynbud nam ba ka BJP kam long ka bha, pynban ha ka ki don shibun ki lad jingïarap kiba long ka jingmyntoi ïa ki paidbah kiba hapoh jong ka Ri India khlem da kheiñ bad ñiew shiliang khmat ïano ïano ruh.
Kiba ïadonlang ha kane ka sngi ki long naduh u kyrtong jong ka BJP na ka 35-Ranikor Constituency, u Martin M. Danggo uba la ai ki kyntien pdiang sngewbha, u Jayanta Kumar Das, State Vice President jong ka BJP na Assam, u Shyamal Saikia, State Vice President (SCM), BJP na Assam, ka kong Pelcy Snaitang, u bah Manstudy Nongrem, u T.G. Momin, u R.R. Marak, u bah Bros Syiemlieh bad u L.A. Sangma lem bad ki paidbah nongkyrshan na kylleng ki jaka kiba ha ka thaiñ Khonjoy.
