Nongstoiñ, Rymphang, 19: “U bah Andrew Charles Gare u dei u kyrtong ka Indian National Congress u ban ai reng na ka 34-Mawshynrut (ST), u dei u briew uba dang don ha ka case POCSO section 9 (k)10 POCSO.
Ïa kane ka case ka dang don ha kti jong u Special Judge (POCSO) West Khasi Hills, Nongstoiñ. Kumta halor katei ka case na ka liang ka ka party Congress na ka District Congress Committee West Khasi Hills bad ka 34-Mawshynrut Block Congress Committee, ka la ïakynduh ïa ki Advocate jong ngi, kumta ki la batai ïa shai ïa ngi ba katba ka Ïingbishar ne ka Court kam pat ai rai pynrem ïano ïano ruh, ki dang don hok ban ïa leh ïa kano kano ka election ruh”, ong ka kyrwoh khubor ba phah da ka BCC Mawshynrut, Bah Break Lyngkhoi Vice President ka 34-Mawshynrut Block Congress Committee.
Ka kyrwoh ka ong ruh, “Halor katei ka nongrim, ka party Congress na District Congress Committee bad ka Block Congress Committee, West khasi Hills bad ka party Congress baroh kawei, ka la i bit i biang ban pynïaleh na ka party INC na ka 34-Mawshynrut Constituency ïa u Bah Andrew Charles Gare.
“Ha kaba ïa dei bad ka jingpynmih khubor ba la kham slem jong ngi, ngi pan map na phi ki bor jong ka Aiñ bad na phi ruh ki paitbah Nongshong shnong baroh kawei jong ka 34-Mawshynrut, ka District West Khasi Hills bad ka Jylla Meghalaya,” ong u kyrwoh.
