Nalor ka dheng kali kylla ruh ki kali ba sniew palat ka surok Jowai by-pass

0

Jowai, Jymmang 07: Na ka daw ka jingjur palat ka jingsniew jong ka surok Jowai By-Pass na lad Mukhla haduh Soo mer (Mihmyntdu) kala pynlong ïa kawei ka kawei ka trok kit marbam ban kyllon syndon ha rud jong ka surok.
Katba nang mih ki sngi ki thliew kiba don hapdeng jong ka surok kila nang kham heh bad kane ka paw tang na ka daw ka jingbym ïohi jong ka sorkar halor ka jingsniew jong kane ka surok kaba la buh jingeh ïa ki paidbah nongleit nongwan, shuh shuh une u surok NH-6 udei u budlum uba pynïasoh ïa kiba bun tylli ki jylla jong ka thaiñ shatei lam Mihngi (North East).
Kane ka jingsniew saba palat jong kane ka surok Jowai Bypass kaba tang khyndiat kilo miter kala wanrah ruh ka jingdheng bad don ruh ki kali kiba sahkut ha shiteng lynti.
“Kumba long mynta ïa u surok By-Pass la donkam shisha ban maramot kloi naduh ka jingsiang rong ïa baroh ki bynta jong ka surok” hynrei ka sorkar kam patiaw satia eiei ka shuh eh shah kum bym ïohi.
Kum ban pynkymmaw na ka liang ka ïing bishar ba donburom ka Meghalaya High Court kala dep ban hukum ïa ka sorkar jylla ban pynbha noh ïa ka jinglong jingman jong utei u surok NH katkum ka PIL ba la ujor da uwei na ki nongshong shnong ka East Jaiñtia Hills District.
Lada ka sorkar kam lah ban shimkhia ïa kane ka jingeh ban pynbha pynmiat noh ïa katei ka surok kala long pynban kaba leh nohei ban shan ïa une u surok uba pynïakhlad ban ïaid lyngba ka sor Jowai.

Leave A Reply

Your email address will not be published.