Nongpoh, Jymmang 07: Ha kum kane ka pyrthei kyrduh kam kyrduh jam ba bun ki khun samla ki ju ud ju nam bad ki jingkynduh mawsiang ha ka jingim na ka daw ka jingkyrduh ki kam ki jam, hynrei kane ka jingkyrduh kam kam shym la khanglad ïa uwei u rangbah ha kaba tang da ka sap kyrpang ba la ai u Blei u trei minot ban kyrshan ïa la ka ïing ka sem.
Une u rangbah uba kyrshan ïa ka ïing ka sem tang ki sap kiba don ha ki kam shna kti, u dei u Bah Gilmil Syngkli, na ka shnong Umjarasi ha Ri Bhoi District. Kum ban pyntip paidbah ruh une u rangbah u dei u ba la ju im ban kyrshan ïa ka ïing ka sem da ka kam Misteri ha ki snem ba la leit noh bad dei tang naduh u snem 2019 ba u la sdang ban shna ïa ki kam shna kti ban pynwandur ïa ki jaid mrad bapher bapher kaba dei hadien ka jingwan lynshop ka khlam COVID-19 bad naduh katei ka por u la bteng bad ïaid minot ban pyndonkam hok ïa ki sap tang da ki kam shna kti.
Kumba la lap bad sakhi da la ki khmat, u Bah Gilmil Syngkli u don ïa kata ka sap ban shna kti da kaba pynwan dur ne oh shrong ïa kiba bun jaid ki mrad bad hadien ba la pyndep ban shna un sa die kylla kum kawei ka lad ai kam ai jam ban kyrshan ïa ki khun ki kti bad ka ïing ka sem jong u.
Ki mrad kiba u ju shna bad oh shrong ki kynthup naduh ki Hati, ki Khla, ki skei, ki Kuratia, ki sim, ki dohkha, Klew bad kiba bun jaid ki mrad bad lada u leit ban die ruh bun kiba thied namar u lah ban pynwan dur thik kum kita ki mrad lyngba ki rong ki rup kiba u ai rong tang da ka kam shna kti.
Haba ioh ban ïa kren bad une u rangbah, u Bah Gilmil Syngkli u la ong ba ki don hi ki jingeh kiba u ïa kynduh ha kane ka kam shna kti, namar ki don shibun ki jingdonkam ban pynlut pynsep naduh ki dieng, ki rong ki rup ki tiar ki tar bad namar ba hap ban kyrshan ïa ka ïing ka sem wad hadpeng shibun ki jingeh u hap ban ïaid shah tang ban lah ban pynbiang ïa ki jingdonkam ka ïing ka sem.
Shuh shuh, u la pynpaw ruh da kaba ong ba kum ki nongrep ne ki nongbylla lada long kaba lah ki donkam hi ka jingkyrshan jong ka sorkar, ha kaba lada ka sorkar ka phai khmat ban ai lem da ki kynja skhim kyrpang kane kan ïarap shibun eh ban pynbiang ïa ki tiar ki tar, ki kor ki bor kiba hap ban pyndonkam haba pynwan dur ne oh shrong ïa kino kino ki jaid mrad ne ki kam shna kti, u la bynrap.
Sa kawei ka sap kyrpang kaba une u rangbah u don kam dei tang ba u lah ban oh shrong oh shrup ïa ki jingshna bapher bapher, hynrei u lah ruh ban shna ïa ki kynja jingtem bad ban tep da ki sur tynrai ryngkat ki sur tynrai kiba u pynlut por ha ka por kaba u sngewdon por ban phai sha ka kam rwai ne ka kam tep kam put tynrai.
