Ki shipai BSF ba siat ïap ïa u Bah Roning ki dei ban ngat ha ki kyndon ba tyngeh: MLA Sohra

Shillong, Jymmang, 07: Ka jingshah siat ïap jong u Bah Roning Nongkynrih na ka shnong Jalynteng, Raid Nongkynrih, u nongñiah trok kit masi ha ka miet 5 tarik mynta u bnai ha ki shipai Border Security Force (BSF) ha Pohshna ka la wanrah ka jingpynrem kaba jur na kiba bun ki liang.
U MLA jong ka Sohra u Bah Gavin M Mylliem ha ka jingïakren bad ki lad pathai khubor hadien ka jingleit sngewlem ïa ka longïing jong u Bah Roning ha ka step sngi U Blei, u la ong, “da ka long kumno kumno ruh hynrei ban shim kat ïa ka jingim briew kam long ka lynti kaba dei.”
Haba kaba pynrem jur ïa ki bor shipai BSF, u la ong ba ki bahaiing ki ladep ban ujor da ka ejahar ha Pynursla Police Station ha ka sngi Saitjaiñ.
“Ryngkat ki bahaiing ngin sa nang buddien ïa kane ka kam bad ngan ïakren ba ka aiñ kan pynsted ban pynngat da ki kyndon kiba tyngeh pyrshah ïa ki shipai BSF kiba donkti”, u la ong.
U Bah Roning Nongkynrih u la iehnoh shadien ar ngut ki khun ba dang rit bad ïa la ka kurim bad na ka liang jong ki bahaiing ki la dawa ba ka dei ban don ka jingbishar kaba hok bad ba ka Sorkar ka dei ban leh eiei na ka bynta ka longïing jong u.