Shillong, Jymmang, 07: Kawei ka trok kaba kit ïa ka umphniang petrol kaba don ïa u nombar AS-26C 3817 kaba dang wan sha nongbah Shillong ka la kylla khongpong ynda poi ha ka shnong Mawblei ha ka sngi U Blei.
Ka umphniang kaba don hapoh ka trok, ka la lyngkien lut sha surok kat haduh ba ka la wanrah ïa ka jingdheng kali kaba jur bha ha surok Shillong-Jowai.
Ar tylli ki kali, kawei ka kali Pick-up truck bad kawei ka kali shimet ki la shah ban ha kane ka trok kaba la kylla hapdeng surok kham haneng jong ka Showroom ka Rani Motors.
Ki Pulit jong ka tnat Fire and Emergency Service ki la her mar mar ban synreit um ïa ka trok khnang ban ïada na kano kano ka jingjia kaba sngewsih.
Da ka jingtrei shitom jong ki Pulit, la lah ban khwai noh ïa kane ka trok hadien ka jingïakhun kaba la neh haduh 8 kynta bad ïa ki ar tylli ki kali kiba la shah ban. Ka thymmei khubor ba la ïohlum ka ïathuh ba kane ka trok ka la thmu ban leit buh ïa ka umphniang ha Thangkhiew Service Station kaba don ha Mawlai.
Ha kane ka jingjia ym shym la don satia kano kano ka jingjia basngewsih.
