Shillong, Jymmang 07: Ka All India Primary Teacher’s Federation (AIPTF) kaba long ka synjuk jong ki nonghikai skul Primary kan sa pynlong ïa ka 29 Biennial Conference kaba lai sngi ha Gandhi Nagar, Gujarat ka ban sdang ha ka 11 tarik bad ban sa pynkut noh ha ka 13 tarik mynta u bnai.
U General Secretary jong ka All Meghalaya Primary School Teacher’s Association (AMPSTA) u Bah FC Shullai ha ka jingïakren bad u nongthoh khubor u la ïathuh ba ki don haduh 83 ngut ki nonghikai na kane ka jylla Meghalaya, kata, 36 ngut na rilum Khasi, 28 ngut na rilum Jaiñtia bad 19 ngut na rilum Garo.
Katkum ka jingpynbeit, ka AIPTF ka la khot sngewbha ïa u Myntri Rangbahduh ka ri u Narendra Modi ban long u kongsan.
“Ka jingdawa kaba kongsan kaba ngin sa ïakren sani bha ha ka jingïalang ka ban sa long ha Gujarat ka dei beit halor ka jingdawa ïa ka Sorkar India ba kan pyntreikam noh ïa ka bambam tymmen (Old Pension Scheme) sha ki nonghikai skul Primary ha baroh kawei ka ri India,” ong u Bah Shullai.
Ïa kynhun jong ki nonghikai na kane ka jylla Meghalaya yn sa ïalam da u President ka AMPSTA u Mritunjoy Ch. Marak bad u General Secretary u Bah FC Shullai.
