Shillong, Jymmang, 07: Ki shipai Border Security Force (BSF) na ka 193 Battalion kiba la ïoh jingtip na ki tnat syntiat ha ka sngi Saitjaiñ ki la ïoh kem haduh 13 ngut ki mynder na ka ri Bangladesh katba ki dang rung beaiñ sha u pud u sam jong ka ri India lyngba ka khappud jong ka East Khasi Hills.
Nalor kine, ki shipai BSF ki la ïohkem ruh ïa lai ngut ki nong India (kiba dei ki nongshong shnong jong ka West Garo Hills) na ka jaka ba ki la ïarap ban pynrung beaiñ ïa ki mynder shapoh India.
Ki shipai BSF ki la ïohkem ïa kine ki lai ngut katba ki dang wan mih na khlaw kaba don kham hajan ka Inspection Bungalow bad kiba dang thmu ban kiew da ka kali Tata Sumo kaba la pynieng hajan kane ka jaka.
Ki mynder na ka ri Bangladesh ki la phla ba ki la wanrung sha ka India da ka jingthmu ban leit Kashmir na ka bynta ban leit bylla bad wad kam.
Ïa kine kiba la shah kem la aiti noh sha ki Pulit jong ka Dangar Police Station, East Khasi Hills na ka bynta ban leh ïa kaba donkam.
