Ïa ka synshar khadar ha ka jylla Meghalaya imat lah dei ban aiti noh ha ka iingbishar namar ym don kawei ruh ka mat synshar ïa kaba ki paidbah ki hun. Naduh ka dheng kali, haduh ka jingkhaii tuh ïa u dewiong bad mynta wat ka rukon pynïaid ïa ka tnad bor ding elektrik bad ka jingpynlip ïa ka ding elektrik man la ka sngi naduh ba shimti thymmai ka sorkar MDA2.0, baroh ki la poi hakhmat ka iingbishar. Kane ka kdew ba ki paidbah kim hun satia ïa ka rukom synshar khadar jong ka sorkar. Ngi dei ban kylli la ki jylla kiba marjan, kum ka Assam bad kiwei de ki ïaid lyngba ne em kum kane ka apot ba ngi ïaid mangi ? Hato ka don kata ka “load shedding” lane ka jingpynlip ding elektrik man la ka sngi khamtam ha kine ki bnai ba duna slap? Lada kiwei ki jylla ki ïoh beit ïa ka bording kaei kaba pynlong ïa ka jylla Meghalaya ba kan ïaid lyngba kane ka jingeh kaba pynjynjar pat ïangi ki paidbah, khamtam lei lei kito ki bym ïohlad ban buh ïa uta u ‘invertor’ uba lah ban kyrshan ïa ka bording katto katne por.
Haba phai sha ka synshar khadar ki don bun ki jingdkoh kum ki surok kiba lah rong noh ka um tang shu wan u slap uba jur. Ka um bam um dih ruh dang bun bah ki shnong bad dong ki bym pat ïoh satia ïa ka um hapoh iing. Haba leit sha ki shnong bapher bapher kane ka jylla ngi shem ba ki nongshong shnong ki hap ban ap um shi slem bha man la ka step. Lada dei kiba hap leit trei dang step te ki lah duh um namar ka um ka wan naduh 10 baje haduh 12 baje eiei. Lehse ki la shu hap ban thied um lym kumta kin ym ïoh ka um wat ban dih ruh.
Lada phai sha ki surok kylleng kane ka jylla ngi shem ba kim don satia ki nala tuid um ha baroh ar liang surok. Khlem ka nala ka um slap ka tuid lyngba ka surok bad lada wan lei lei u slap uba jur te ka um ka rong syndon ïa ka surok rong. Haba ka sorkar lyngba ka tnad PWD ka pyntrei ïa ki surok ha kylleng ka sor bad sha ki nongkyndong ruh, hato ki nongpynïaid shnong kim dei ban peit pahara ba ka jingshna ïa ka surok kan long katkum ki jingbthah jong ki kyndon ka PWD? Balei ki nongpynïaid shnong kim kren bad kdew ïa kine ki jingduna halor ki kam pyntrei surok na kino kino ruh ki jingtrei ha kiba la pynlut da ka pisa paidbah?
Ngi long da shisha ki briew kiba mynthi bad kiba ïaishah slem. Toi ngi lah dei ban pynlong da ka jingïalang paidbah ban ïakren halor kane ka jinglip ding kaba man la u snem khlem da don kano kano ka jingkylla. Ngi la dei ban buh ïa kine ki jingkylli hakhmat ka sorkar : (1) Kaei ka daw jong ka jinglip ding man la u snem ha kum kine ki por? (2) Aiu ka sorkar ka la leh ban pynbeit ïa kane ka kam? (3) Haduh katno Megawatt ka jingdonkam bording jing kane ka jylla jong ngi ha ka shi sngi? (4) Katno kilowatt ka MeECL ka pynmih bording ha ka shisngi? Katno ka jingduna ban pyndap ïa ka jingdonkam jongngi shisngi shisngi? Mano ba pyndonkam bording eh? Ki ophis sorkar, ki paidbah nongshong shnong, ki karkhana rit ne ki karkhana pynmih dewbilat? Kine ki jingkylli ha ka jingshisha lah dei ban kylli da ki nongthaw ain jongngi wat la ym long Assembly ruh. Hynrei kine ki MLA ïa kiba ngi la jied bunsien ki shimkhia tang ïa ki mat ki phang kiba pynkhihwin ïa ka jingmut jingpyrkhat ki paidbah khnang ban lah ban pynkylla politiks ïa kaei kaei baroh bad ban ïoh khring vote ha u snem 2024. Kane kein ka dei ka jingeh jongngi ki paidbah.
Kita ki nongmihkhmat bunsien ym ïohi satia ïa ki khmat jong ki. Shisien ba lah dep ka elekshon tang ka khmat ruh ym ïohi shuh bad kim ju wanmih satia sha ki shnong ki thaw ban peit kaei kaba tam bad kaei kaba duna. Lada kren hok te bun sa tang ki jingduna suda. Hynrei ynda sngap ïa ki jingkren ka sorkar man ka sngi te sngew kum ban jaw da ka khlein suda.
Ha kine ki khyndiat sngi ba la dep ka la mih sa ka jingkulmar halor ka jingphah kyrteng ïa ki nongthaw phlim na kane ka jylla ban phah sha kata ka thymmei ha kaba ki nongthaw phlim kiba la pawnam na kylleng ka pyrthei ki poi lang bad ki ïoh ban ïakynduh bad ban ïa syllok lem bad kiwei pat ki nongthaw phlim. Na kane ka jylla jongngi ka tnad sorkar kaba dei peit ïa kane ka kam bad ban phah ïa ki artylli ki kyrteng – ka DIPR – ka la phah ïa ka kyrteng u Rangbah Pradip Kurbah bad U Dominic Sangma. Hynrei la don da uwei pat u ophisar sorkar uba la phah ïa ka kyrteng u Commander Shangpliang bad u Nicholas Kharkongor beit beit sha ka Ophis jong ka sorkar kmie. Ka jingkylli ka long hato U Commander Shangpliang u la pynmih mo ki phlim kiba la ïoh khusnam da ka sorkar India bad sha kiwei pat ki rynsam shabar ri? Tang namar ba u Shangpliang u la pynlong ïa kata ka International Film Festival mynta u snem da ka jingbei tyngka ka sorkar haduh shi klur shiteng (1.5 crore) na ka tnad sorkar Tourism hato u dei mo ban shah jied ban leit shata ka Cannes ha ka shnong France?
Bun kum kitei ki ju jia bad ïai jia hynrei ngi ki paidbah ngi shu sngap jar bad ngi shu ia bun nia ha ka social media khlem sa lah ban thaw pyrthei pat haei haei ruh.
Sa kawei kaba ngi leh bakla kum ki riew peitngor ka long bai a baroh ki jingeh jingshon jongngi ngi kloi ban leit tynrong ha ka tyrpeng jong ki seng bapher bapher ïa kiba la khot ki pressure groups, kaba mut ki seng kiban kdew sha ka sorkar ïa ki jingeh ki paidbah. Hynrei haei kita ki seng ki ban kren halor ki kam bamsap kiba paw tyngkrein? Haei kita ki seng ki ju kren shaphang ki surok bad ka jingkordit ban ïoh ïa ka um bam um dih? Nadien nangne ngi la dei ban ïalum ïalang noh ban ïamir jingmut kumno ba ngin kit khlieh noh dalade ïalade bad ban ïamih paidbah lada donkam khnang ban ïoh ban ïatai ïa kiei kiei kiba ktah ïangi shimet shimet bad ïa ki shnong ki thaw hi baroh. Kane ka dei ruh ka kamram jongngi ki paidbah ha ka ri ha kaba mangi ngi dei ki nongsynshar kiba shisha.
