Shillong, Jymmang 07: U Director General of Police (DGP) u Dr LR Bishnoi ha ka sngi Thohdieng jong ka 5 tarik Jymmang u la ïathuh ba na ka liang ka tnat pulit ka la ïoh ban kem haduh 224 ngut ki nongkhaïi drok bad 37 ngut napdeng jong ki pat dei ki kynthei.
Haba kren sha ki lad pathai khubor u DGP u la ïathuh ba na ka liang ka tnat pulit ka shim ba ka jingïakhun ban rat dyngkhong ïa u drok ka dei ka thma ba ha khmat eh.
“Ngi don mynta ruh hapdeng ka thma pyrshah ïa u drok bad ngin dang bteng ban ïakhun haduh ban da jop,” u la ong.
“Nga kwah ban ïathuh ba ha kine ki 1 snem ba la leit la dep ban rejistar 181 ki case pyrshah ïa ki nongkhaïi drok bad la kem 224 ngut kiba don kti ha kaba 37 ngut napdeng jong ki pat ki dei ki samla kynthei,” u la ïathuh.
“Napdeng kiba shah kem 68 ngut ki dei na kiwei pat ki jylla ba kynthup na Manipur, Tripura, Nagaland bad Arunachal Pradesh,” u la bynrap.
U la ïathuh ruh ba la ïoh ban kurup 127 tylli ki kali bad 292 tylli ki mobile phone kiba pyndonkam da ki nongkhaïi drok.
“Ha kane ka shisnem ba la leit ngi la ïoh ban kurup 11.6 kilo u drok heroin, 4600 kilo u kynja, 50,000 bitor ka dawai jyrhoh, 42000 sla u dawai kuli yaba bad 47,000 tylli kiwei pat ki kynja drok,” la ïathuh u DGP.
“Ka jingjyllei u drok ka long kaba palat liam bad na kata ka daw ngi khot ïa baroh ban snohkti lang ban rat dyngkong syndon bad na ka liang jong ngi ruh ngin bteng ban khynra drok,” u la bynrap.
