Shillong, Jymmang 7 : U bah P.T Sawkmie MLA ba rim ka Mawlai bad uwei na ki nongïalam ka UDP u la ong ba u dang khmih lynti ba ka North East Democratic Alliance (NEDA) kaba kynthup ïa baroh ki myntri rangbah jong kane ka thaiñ ka la dei ban thaw ki lad jingïarap na ka bynta kine ki jingjia ïaumsnam ha Manipur hynrei kaba lyngngoh ka sngap man man pynban.
Halor kane ka jingjia ha Manipur u bah Sakmie u la pynpaw ka jingsngewkhia jur namar kiba bun ki mynsiem briew ki la duh ei ïa ka jingim bad bun bah kiba la mynsaw bad kan shim por da ki phew bnai bad snem ban tei thymmai pat ïa ki jingjulor jongka Manipur.
U la ong wat ki MP kane ka thaiñ ruh ki don la ka jong ka Forum ban peit lang ïa kino kino ki jingeh jong kane kat thaiñ hynrei mynta ka kynti kat kane ka jingjia ki kynjah jar jar, shano ki jah haba ka Manipur ka dang kem ding bad donkam ka jingïarap.
U la pynpaw ruh ka jingsngewlyngngoh ba ka sorkar India ka pyntreikam da ka Article 355 haba ka sorkar jylla ruh ka dang don ne hato ka sorkar pdeng ka mut ban pynjari noh da ka jingsynshar President ha Manipur.
Khatduh eh u ai khublei kyrpang ïa ka sorkar jylla ba la ïalam da u myntri rangbah u Conrad K Sangma kaba la shim khia haduh katta katta halor kane ka jingjia ban phah shaw noh koi kloi ïa ki samla pule ka jylla kiba pule ha Manipur ba kin ïoh ban poi suk poi saiñ sha ka jylla bad sha la ïing la sem jongki.
