Nongpoh, Jymmang 06: Kum kawei naki thong ban nang kyntiew ïaki kam jngohkai pyrthei haka thaiñ Ri-Bhoi, ka shnong Lawbyrwa kala pynpaw pyrthei ïa kawei ka jaka jngohkai pyrthei kaba la tip kum ka Lumkshaid Tourist Spot, kaba lah ban khring ïaki paidbah ban leit kai pyngngad ha katei ka jaka.
Katei ka jaka jngohkai pyrthei kadei kaba shna pynwandur hi da ki nongshong shnong jong ka shnong Lawbyrwa bad ïaka jinglut jingsep baroh la pynlut da ka Dorbar Shnong, bala wan ruh ban plie paidbah syndon ïaka da u Arpit Upadhay Deputy Commissioner ka Ri-Bhoi District kum u kongsan haka sngi Saitjaiñ haka jingdonlang u Bah I Swer Director ka Basin Development, Bah Garland Sun Block Co-ordinator, Bah D Lyndem, Bah Rijied Kharkrang Rangbah Shnong Lawbyrwa, ki dkhot ka VO bad ki nongshong shnong.
U Bah Rijied Kharkhrang, Rangbah Shnong ka Lawbyrwa u la ïathuh ba ïa kane ka jaka jngohkai la sdang naduh mynshem snem bad u pynpaw ïaka jingsngew nguh ïa baroh kiba la trei shitom ban pynurlong ïa kane ka kam haduh ba la lah ban plie paidbah noh syndon ïaka. U la ong ruh ka jingplie ïa kane ka jaka jngohkai kan kan long ruh ka jingkyrkhu ïakatei ka shnong haka ioh ka kot, ka ïohkam ïoh jam jong ki khun samla bad kumjuh ïaki longkmie jong kane ka shnong ynda ka la ïaid bha kane ka kam.
Naka liang u Arpit Upadhay Deputy Commissioner ka Ri-Bhoi District u la pynpaw ka jingsngewkmen kaba khraw ïaka jingshimkhia jong ka Dorbar Shnong ban pynpaw pyrthei ïa katei ka jaka kaba lah ban khring ïaki nongjngohkai pyrthei, ban kyntiew ruh ïaka ioh ka kot jong ka shnong kumba katei ka jaka ka long kaba itynnad naka jinglong kyrpang jong ka jaka bad ka mariang sawdong sawkun, ba ki paidbah ki lah ban leit kai sngewbha lane ban ïaid kjat.
U la ong ruh ba kum kitei ki jaka kin kyntiew ïaki kam jngohkai pyrthei ha Ri-Bhoi District bad kyrpad ruh ïaki paidbah kiba leitkai ha katei ka jaka ban sumar ïaka mei mariang, ban lehkuid ym ban leh dusmon lane ban pynjaboh ïaka namar ka don ruh ka wah ha katei ka jaka.
