Nongpoh, Jymmang 26: La jan man la ka por ki paidbah nongshong shnong ka Umskun kaba don harud ka surokbah National Highway-6 ha Ri Bhoi ki ju mad ïa ka jingsyrtok ka jingim ha ka leit ka wan, namar tang shu jur u lapbah la thikna ba ka surok ïaid paidbah ka la shah tap ha ka umsaw kaba dei na ka daw ka jingbym biang ki Nala Um ka surok 4-lane ha Ri Bhoi.
Ki paidbah ka shnong Umskun dang hynnin ka sngi ki la hap ban ïaid lyngba ka surok ktieh ba ka um ka la tap shaduh ka surok, kaba dei hadien ka jingjur slap ba u lapbah u la ther bad na ka daw ka jingbym biang ki Nala um ka um ka la shlei shaduh ka surok jong ki nongshong shnong ka Umskun kiba la hap ban mad ka jingsyrtok ha ka leit ka wan bad ka kit ka bah.
Kine ki paidbah nongshong shnong ka Umskun ym tang ba ki ju mad jingeh na ka daw ka jingshlei um shaduh ka surok ba ki pyndonkam ha ka leit ka wan, hynrei kum ki nongshong shnong ki ju jynjar ruh ban leit ban wan ha ka por lyiur namar haduh mynta wat la kane ka shnong ka don tang shi pda maw na ka surokbah National Highway06 hynrei haduh mynta kim pat ioh satia ïa ka surok kaba la bit la biang na kaba siang rong pura bad ka dang dei tang ka surok khyndew bad ka surok ktieh.
U Rangbah Shnong ka Umskun, u Bah Stephan Kshiar u la pyntip ba kum ki nongïalam shnong ki da sngewdiaw shisha halor kane ka jingshah iehnoh bein kaba haduh mynta ki paidbah kim ioh ïa ka surok kaba la bit la biang bad kum ki nongïalam shnong ki da sngewpangnud ruh ban iohi na ka por sha ka por ïa ka jingeh ki paidbah ha ka leit ka wan bad khamtam ki khynah skul bad kiba pang ba shitom.
Ngi shah iehnoh bein naduh ka sorkar kaba ym phai khmat ïa ka jingdonkam ki paidbah bad mynta pat ngi shah iehbein wat ha ka National Highway Authority of India, kaba khlem da shna bha ïa ki nala ha kaba pynheh ïa ka surok 4-lane bad naduh ba la pynheh ïa kane ka surok 4-lane tang shu wan u lapbah la thikna ba ka surok ba ki ïaid paidbah ka la dap um.
Halor kane ka bynta kum u nongïalam shnong u da buh ruh ka jingkyrpad kaba jur naduh ki nongmihkhmat, ka NHAI bad khamtam ka sorkar Meghalaya ba kan thaw lad noh ban pynbit pynbiang ïa katei ka surok kaba don tang kumba 5 km ei ei ka jingjngai na ka surokbah bad lada kum ki paidbah ki ioh ïa kata ka surok kaba la bit la biang kan long shisha ka jingkyrkhu ha baroh ki liang, u la bynrap.
