Da ka ‘Joint Inspection’ leit jurip ïa ka surok Jowai By-Pass na Khliehtyrshi-jingkieng Treïongriang

Jowai, Jymmang 26: Shi bynta ban ïada ïa ka sawdong sawkun jong ka mariang khnang ban lait na ka jingshah ktah jong ki wah duid, ki hali ki pynthor bad ki bynta jong ka wah Mynkrem bad ka wah Myntdu kaba dei ka nongbsa umbam ïa ka sor Jowai.
Mynta ka sngi na ka liang ki bor sorkar lyngba ka ophis u Deputy Commissioner ka West Jaiñtia Hills District kila pynlong da ka ‘Joint Inspection’ ban leit jurip ïa ka rukom pyntrei ïa ka surok Jowai By-Pass uba pynïasoh na ka surok bah NH-44 na Khliehtyrshi haduh ka surok NH-40E ha jingkieng Treïongriang ba leit sha Amlarem.
La ïathuh ba ka jingngai jong kane ka surok By-Pass kam duna ïa ka 6 kilo miter ïa kaba la pyntrei da ka Company M/S Kampung Kamyer Trading Co. kaba na ka jylla Arunachal Pradesh ha ka jingmang pisa kaba 93 klur.
Ha kane ka sngi ba pynlong ïa ka ‘Join Inspection’ la ïadonlang da u Prafulla Kumar Boro, MCS: Additional Deputy Commissioner, kynthup lang ïa ki ophisar na ka Divisional Forest Officer (Territorial) Jowai, u Executive Officer PWD (Road) Central Division Jowai, u District Urban Planner Jowai, ki dkhot ka kynhuh ‘Khooid Ya Ka Wah Myntdu’ bad ki nongrep ha ki bynta ka pynthor neiñ.
La leh ïa kane hadien ba ka Assistant General Secretary ka kynhun ‘Khooid Ya Ka Wah Myntdu’ kala dep ban ujor pyrshah halor ka rukom pyntrei ïa utei u surok kala long pyrshah ïa ki kyndon jong ka National Green Tribunal (NGT) ba don burom.
Khlem da pynslem u Deputy Commission ka WJHD bah Garod L.S.N. Dykes, IAS ula khot ban pynlong ïa kane ka ‘Joint Inspection’ ban sakhi ïa ka rukom pyntrei ïa katei ka surok Jowai By-Pass kaba la long mynta hi ka sngi 26 tarik u Jymmang ha ka por 1 baje mynsngi kaba la sdang na Hill Top Khliehtyrshi.
Na ka liang ki dkhot ka Khooid Ya Ka Wah Myntu kila ai jingmut khamtam ïa ka tnad PWD (Road) ban kan bthat ïa ka rukom pyntrei ïa ka surok da u Contractor katei ka company ba kin bud beit katkum ki kyndon jong ka NGT bad kaba ym ktah satia ïa ki sawdong sawkun jong ka mariang khamtam ïa ki bynta jong ka wan Mynkrem kaba don hajan.
Na ka liang ophisar jong kitei ki tnad ruh kila pynsngew ban kin ai ka Details kiba dei ban leh ha ka por ba pyntrei ïa kane ka surok Jowai By-Pass, katkum ki kyndon ka NGT naduh ka jingjngai, ka rukom bret ïa ka kyndew, ka lad ban ïada na ka jingshah pynjulor ki dieng ki siej bad kumjuh ïa ka wah Mynkrem bad ka wah Myntdu.
Ha kaba ïadei bad ka jaka tam umbam ha ki bynta ka dam um jong ka tnad PHE kaba don ha Moopiah na ka liang ka ‘Khooid Ya Ka Wah Myntud’ kala dawa ban pynkhuid noh ïa ka khyndew kaba lang khnang ban pynïoh ïa ka umbam sha ki paidbah da kaba khuid ba suba.