Da ka jingïalehkai Mawpoiñ rakhe ka SWKH ïa ka jingdap 75 ka ri bad 50 snem ka Meghalaya

Mawkyrwat, Jymmang 26: Kum shibynta jong ka jingrakhe ïa ka jingdap 50 snem jong ka jingïoh ïa ka jylla ba pura bad ka jingdap 75 snem jong ka jingïoh jinglaitluid jong ka Ri India, ka ophis jong u District Sports Officer, South West Khasi Hills District ryngkat ka jingïatreilang bad ka District Administration, South West Khasi Hills District mynta ka sngi ka la pynlong ïa ka 1st Mawkyrwat Mawpoiñ Competition (Invitational) 2022 ha ka distrik ba la pynlong ha madan jong ka MDSA Mawkyrwat ha kaba u bah S.C. Laloo, ADC, South West Khasi Hills District u la long u kongsan.
Lah ban kdew ba ha kane ka 1st Mawkyrwat Mawpoiñ Competition (Invitational) 2022 ki la don haduh 160 ngut ki nongïashimbynta kiba dei na ki 16 tylli ki kynhun kata 8 kynhun na ka liang ki shynrang bad 8 kynhun na ka liang ki kynthei bad kane ka jingïalehkai ka ban neh 2 sngi kynthih.
Haba kren ha ka jingïalang kum u kongsan u bah S.C. Laloo, Additional Deputy Commissioner jong ka South West Khasi Hills District u la ong ba ngi sngewkmen ban ïoh ban rakhe ïa ka jingdap 50 snem jong ka jingïoh ïa ka jylla ba pura lyngba kum kine ki jingïalehkai kiba pynkynmaw ïa ki por ba rim kaba la ju mat bha ban ïashimbynta ha kane ka jingïalehkai naduh ki por kiba mynshwa. Shuh shuh u la ong ba kane ka jingïalehkai ka long ka jingïalehkai kaba la rim bad kaba la pynkhie im bad pynrung hapoh ka Sports Department.
U la ong ruh ba ki jingïalehkai ki long kum shibynta ha ka jingïaid lynti kum ha ka jingim briew ymdei tang ban pynlut por hynrei ka ïarap ïa ki ba kin shait kin khlaiñ ha ka bor met bad ki jingmut jingpyrkhat. Ha kajuh ka por ka lah ban pynkylla dur ïa u ne ka briew ha kaba ha kine ki sngi kiba mynta ki shim ïa ka kum ka lad kamai. Namarkata, u la kyntu ïa ki briew ban ïashimbynta ha kiba kum kine ki jaid jingïalehkai namar ka jingkiew jong ka distrik bad ka jylla baroh kawei kam shong eh ha ka jingpyntreikam ïa ki skhim ne projek hynrei ka shong eh ha ka jingïashimbynta lang jong u paidbah ha kiba bun ki bynta jong ka jingim.
U bah Damang Syngkon, District Sports Officer, South West Khasi Hills District u la pynkynmaw ba haba phai ha ka jingïalehkai Mawpoiñ bun na ki ki ïa tiplut hynrei kam pat ju don pat kaba kum kane ka lympung ban pynïathong ne ïakop, na ka bynta ki rukom pynïaid ha ka rukom kaba dei. U la ong ruh ba ïa kane ka jait jingïalehkai la ju pynlong borabor ki dei ki kynhun Seng Khasi kum ki jait jingïalehkai tynrai kum ki rong biria ki Mawpoiñ bad ki Mawkyntieng bad kiwei kiwei de kata naduh ki snem 1980 ki la ju pynlong kum ia kine ki jait jing ïalehkai hapoh ka jylla Meghalaya.
Ha kajuh ka por u la pynkynmaw ba ïa ka jingpynïalehkai Mawpoiñ la ïoh ban pynithuh nyngkong ha u snem 2010 ba ki la ïoh ruh ban shim kum kawei ka jait jingïalehkai ha ka North East Game 2022 ha Nongbah Shillong.
Kiba ïadonbynta lang ha kane ka sngi ki kynthup ïa ka kong J.U. Kharpuri, Additional Deputy Commissioner, South West Khasi Hills District, u bah Steveford Marweiñ, EAC, South West Khasi Hills District bad u bah Y.G. Lyngdoh, Working President ka MDSA lem bad kiwei.
Ïa ka jingïalang la pynïaid da u bah D. Marweiñ, L.D.A, District Sports Officer, South West Khasi Hills District uba la ai ruh ïa ki kyntien khublei.