Jurip bad ai por ar tang taïew ka KSU ïa ka Sorkar ban thung ïa u EE ha PHE Mawkyrwat Division

Mawkyrwat, Jymmang 26: Hadien katto katne bnai bad mynta la kynjoh ïa ka shiteng snem ka jingthylli jong ka shuki jong u Executive Engineer jong ka PHE Mawkyrwat Division ka la buh jingeh shibun na ka bynta ki paidbah kiba leit bad thmu ban leit na ka bynta ki kam kiba kyrkih, hooid u SDO u don hynrei ka kham pher shibun lada don u ba kham halor uba shong ha ka shuki kum u Engineer.
Kumta halor kane ka bynta, ka Khasi Student Unions’ (KSU) jong ka Mawkyrwat Circle bad ka Ranikor Circle mynta ka sngi da ka jingsngewkhia hadien ka jingud jingnam jong ki paidbah jong ka distrik na ka daw ka jingbymdon u Executive Engineer ba pura na ka tnad umbam um dih hapoh jong ka Mawkyrwat Division kata naduh u snem ba la dep haduh mynta ka long 6 bnai tam ei ei ha kaba ka shuki ka thylli bad ympat shem don mano mano ba wan trei ne mih bujli naduh ka por ba la shah pynkynriah noh ïa u E.E.
Namarkata, ki nongïalam jong ka KSU haba kren ha ki ladpathai khubor ki la pynpaw ka jingsngewkmen ba ki la ïoh ïa u MLA na Mawkyrwat Constituency, u bah Renikon Lyngdoh Tongkhar kum u Myntri uba dei peit ïa ka tnat umbam umdih jong ka jylla Meghalaya hynrei sngewjah burom pat haduh 6 bnai tam ei ei um shym la lah ban wanrah ïa u Executive Engineer ba pura ha kane ka distrik, namar haduh mynta bun ki kam ki jam ki la sah teng lut.
Ka seng KSU ka la buh ka jingkylli ruh, “Hato ka don kaei kaei sha lyndet, balei kum u Myntri um shym la shimkhia halor kane ka bynta bad lano un wan ban pynmih bijli da u ba thymmai ne wanrah ïa u Executive Engineer ba pura hangne hapoh ka ophis jong PHE ha Mawkyrwat Division??”.
U President jong ka KSU Ranikor Circle, bah Marcony Thongni bad u President ka KSU Mawkyrwat Circle, bah Pauldep Tongwah ki la ong ba kum ka seng ka kyntu ïa ki nongmihkhmat hapoh jong ka South West Khasi Hills District ïa u bah Renikton Lyngdoh Tongkhar, MLA ka Mawkyrwat Constituency bad ïa u bah Pius Marweiñ ba kin sngewbha ban shimkhia halor kane ka bynta khnang ba kan nym long ka daw jong ka jingduh nong jong ki paidbah.
“Lada jia ba kim lah ban wanrah ïa u Executive Engineer ba pura hapoh ka ar taïew, ka seng kam banse ka hap ban shim da kiwei pat ki synjam wat ban wan khang tala noh ïa katei ka kamra trei kam jong u E.E ka PHE Mawkyrwat Division”, buh ruh ka jingmaham lypa ka seng namar kumba ka paw watla u don u SDO u ban peit lang ïa ka kamram kum u EE In-charge ruh katno eh un lah ban pyndep ïa ki kam kiba bun na ka bynta ki kam kiba ïa dei hapoh ophis namar baroh ki la sahkut bad ka la pynjynjar sat ïa ki paidbah jong ka Mawkyrwat C&RD Block bad jong ka Ranikor C&RD Block.