Pyrta shla ki khynnah skul ban pyrshah ïa u Duma ha baroh kawei ka South West Khasi Hills

Mawkyrwat, Jymmang 26: Ka ophis jong ka District School Education Officer (DSEO), Mawkyrwat ryngkat ka jingïadonbyntalang jong ka Sambandh Health Foundation (SHF), ka seng treimon sngewbha kaba don ha Gurugram, ka la pynlong ïa ka ‘Signature Campaigns’ ryngkat ki jingïa-ïaid paidbah ne rallies ha kyllleng ka distrik naduh ka 18 tarik u Ïaïong haduh ka 20 tarik u Jymmang, 2020 ban pynsngewthuh paidbah halor ka jingpyrshah ïa ka jingbam bad ka jingdih ïa u duma.
Ha kane ka prokram ba kyrpang palat ïa ka 450 tylli ki skul ki la ïashimbynta shitrhem ha ki Rallies bad Signature Campaigns ba la pynlong ha baroh kawei ka distrik halor ka phang pdeng, “U Duma uba long ka jingma ïa ki sawdong sawkun” kaba long ruh kum shibynta ïa ka jingrakhe ïa ka World No Tobacco Day (WNTD) kaba ju long ha ka 31 tarik u Jymmang man la u snem ryngkat ka jingthmu ban pynshai bad pynsngewthuh paidbah halor ka jingma jingmynsaw na ka jingpyn-donkam ïa u duma uba ktah bad pynjakhlia ym tang ïa ki sawdong sawkun hynrei u ktah ruh ïa ka koit ka khiah ha ka imlang sahlang.
Ka jingrakhe ïa ka World No Tobacco Day ka kham pher shibun na ki snem kiba la leit ha kaba jan baroh ki skul ha ki bynta bapher bapher jong ka distrik ki la ïashimbynta na ka bynta ban ïasam lem ïa ki jingtip halor ka jingpyndonkam ïa kiba kum kine ki jingbam jingdih kiba ktah ïa ka koit ka khiah bad la khmih lynti ba lyngba kum kine ki jingïa-ïaid paidbah bad ka jingïashim bynta jong ki khynnah skul kan thaw thymmmai bad pynkylla ïa ki jingmut jingpyrkhat jong ki briew bad kan pynduna ïa ka jingpyndonkam ïa kiba kum kine ki jaid jingbam jingdih.
Ha kine ki jingïa-ïaid paidbah ne Rallies la ïoh haduh kumba 477 tam ei ei ka jingsoi na ki lok ki jor, kiba ha-ïing ba ha-sem bad ki marjan marpa.
Kane ka campaign ka long shibynta kum ka Tobacco Free Educational Institutions (ToFEI) prokram ba la pynlong ha ka jylla ha kaba ki khynnah skul ki la ïashimbynta kum ki nongmait lynti halor ka jingpyrshah ïa ka jingpyndonkam ïa u duma bad lah ruh ban kdew ba ka jylla jong ngi ka kiew bha kiba ïoh bampong ne cancer ha ka ri baroh kawei ha kaba kumba 8,000 (phrahajar) ngut ki ïap man la u snem na ka jingbam bad jingdih duma.
Ka Dr. Lana Nongbri uba long u State Nodal Officer, National Tobacco Control Program ka Meghalaya u la phah ïa ka khubor ban pynsngewthuh paidbah ba u Duma ym tang ba u pynjulor ne pynsniew ïa ka mariang hynrei u da pyntroiñ ïa koit ka khiah, u thaw bun jaid ki jingpang bad ka jingïap bad u wanrah jingeh bad jingjynjar ïa shibun ki longïing longsem bad u khmih lynti ba lyngba kum kine ki Tobacco Free Educational Institutions programme yn lah ban wanrah ka jingkylla bad ka jinghiar ha ka jingpyndon kam ïa u duma.