Nongstoiñ, Jymmang, 26: Ka jingshah siat ïap jong ki saw ngut ki rangbah Khasi ha Langpuh ha ka 14 tarik Jymmang 2010, ka dei ka history ka ban pynsah jingkynmaw pateng la pateng ïa ka Jaitnynriew Khasi Pnar, khamtam eh ha une u snem u ba ka jingïapynbeit pud ka la sdang ban ïaid shakhmat, watla ym pat lah ban tip haduh lano ka jingïakren ban pynbeit ïa ki jaka ïakajia pud kiba hap ha ka Langpih sector kan sdang.
Nalor kata ka Langpih sector kan dei kaba eh tam ban ïa pynbeit, namar ka jingkyntur pud jong ka Assam ka la poi haduh Mawsikar bad ki Nepali kiba ka sorkar Assam ka la pyndonkam kum ki diengker kper bad ki mawpud mawsam, ki la kham bun ha ka jingdon briew nalor ba ki don ka jingïatylli bad ka jingïasngewthuh jingmut bad ka sorkar Assam.
Ha ka jingshisha mynta u snem ka dei ka kabu kaba khraw ïa ki paitbah kiba shong ha ki shnong kiba hap ha ka Langpih sector, ba kin rakhe kham kyrpang ïa katei ka sngi 14 tarik bad ban da khot shisyndon ïa u Myntri Rangbah ka jylla, ba un wan khnang ba un sngewthuh haduh katto ki saw tylli ki longïing kiba la duh noh ïa ki kpa ki ïakynduh jingeh ha ka ban bsa ïa ka ïing ka sem bad ki khun ki kti haba u nongkamai kajih um don shuh.
Nalor kata mynta u snem ka dei ruh ka kabu kaba biang ban rakhe ïa katei ka sngi, namar lada ka sorkar Meghalaya bad Assam kin bakla ban ïapynbeit kum ba long ha ka thaiñ Malangklona, ka jingeh kaba kham jur kan mih ha Langpih sector bad ka jingïap kan ym long tang saw ngut hynrei ka lah ban poi da ki phew bad ki spah ngut.
Kum ban pynkynmaw ba ïa ka jingshah siat ïap jong ki saw ngut ba kynthup ïa u (L) Kolombos Hoojon na ka shnong Umyiap,u (L) Denis Nongsiej na Mawsikar, u (L) Ekros Rani na Mawdiangsnam bad u (L) Charles Lyngkhoi na Mawlan, la ju rakhe man la u snem lait noh ba don ka khangdam mynshem u snem. Kaba lyngngoh ka long ba mynta u snem wat la ka sorkar kam shym la pyntreikam shuh ïa ka jingkhang dam hynrei ym shym la pynlong satia ïa ka jingrakhe kynmaw burom ïa katei ka sngi.
Ha ka jingshisha naduh ba ka Khasi Hills Autonomous District Council, ka la pynmih pyrthei biang ïa ka hima Nongmynsaw bad ka la thung ruh ïa u bah Phlowing Syoem Nongbah kum u Acting Syiem jong katei ka hima, ka la dei ka pali jong u bad ka Executive Comiittee ban shim ïa ka jingkitkhlieh ban rakhe ïa ka lynkhuh snem ba 12 jong kitei ki rangbah kiba la duh ei ïa la ka jingim ha ki pulit Assam kiba la thom bor ïa katei ka thaiñ naduh u snem 1979 haduh kine ki sngi.
Ka jingbym leh ei ei jong utei u Acting Syiem bad ka Executive Committee jong u ïa katei ka sngi ba kyrpang ka pyni shai kdar ba um pat bit ban bat wat tang kum u sordar shnong ruh. Ka jingpynkhie im jong u bah Pynshngaiñ N.Syiem ïa ka hima Nongmynsaw bad ka jing pynkup bor jong u ïa u bah Phlowing Syiem Nongbah, kum u Nongsynshar ka dei namar ka jingkwah burom palat khlem da tip shano kan poi.
