Ka National Games 2027 ha Meghalaya kan long ka nongmuna bathymmai ïakiwei ong u Mandaviya

Shillong, Jymmang 30 : U Myntri ka Sorkar Pdeng uba dei peit ïa ka tnad Youth Affairs bad Sport u Dr Mansukh Mandaviya mynta ka Sngi Saitjaiñ u la ong ba ka National Games 2027 kaba Laphew Khyndai ka ban long ha Meghalaya kan long ka Nongmuna ba thymmai ha ka histori jong kane ka lympung ïalehkai ki khun samla ka ri bad ula pynbna ruh ban ai jingïarap 150 klur tyngka na ka bynta ban tei ïa ka jaka ai jinghikai kaba tbit tam hapoh ka jylla Meghalaya.
U la pynlong ïa ka jingïalang ban bud dien ïa ka jingpynkhreh pynkhrum na ka bynta kane ka National Games hangne ha nongbah Shillong mynta ka sngi,
ïa kane ka jingïalang hapoh ka jingpynïaid jong u Mandaviya la wan ïashim bynta da u Myntri Rangbah ka jylla u Conrad K Sangma, ka Myntri khynnah ka sorkar pdeng ba peit ïa ka Youth Affairs bad Sports ka Raksha Khadse, u Myntri ka tnad Sport jongka jylla u ma Wailadmiki Shylla, ki ophisar jong ka tnad sport na ki 8 tylli ki jylla kane ka thaiñ bad kumjuh ruh ki ophisar na ka tnad Youth Affairs and Sport jongka sorkar pdeng.
Ha kane ka jingïalang u Myntri u la ong ba kane ka Lympung ïalehkai kam dei tang ban pynpawnam ïa ka jingïalehkai sport hynrei ka dei ban long ruh ka lympung ne ka rynsan ka ban pyni sha ka pyrthei ïa ka jinglong riewspah ka Meghalaya ha ki jingim jinglong bad shad tynrai, ka jingïalong kawei hapdeng kiba bun ki jingïapher bad ter ter. Kane kan long ym tang ïa kane ka thaiñ hynrei ha ka ri hi baroh kawei.
U la banjur ïa ka jingdonkam ban don ki tiar ki tar ïalehkai kat kum kane ka juk ba mynta bad kumjuh ruh ban don ka jingïatreilang jong ki paidbah bad ki bor pynïaid ban pynlong ïa kane ka lympung ïalehkai kaba jop.
Ban pynneh pynsah bad ban ïalong kawei hapdeng kiba bun ki jingiapher ka long ka khubor jongka National Games 2027 ha Meghalaya ong u Mandaviya.
Haba phai sha ka jingjur ka jingïaknieh ban ïoh pynlong ïa ka National Games u la ong ba kane ka lympung ka dei ban long ka lympung ban ïoh jied ïa ki nongïalehkai ha kano kano ka bynta ban mihkhmat ïa ka ri. U la ban jur ruh kane ka lympung ka dei ruh ban long kum ka lympung ban pynsngewthuh bad hikai ïa ki khun samla ba kim dei ban pyndonkam ne ngop da kino kino ki jingdih kiba long kum u drok.
Ula ban jur ba ki valunteer jongka MY Bharat ki dei ban ïadon bynta ha kane ka National Games. La pyni ruh ïa u Myntri iïa ka jingpynkhreh ïa kane ka lympung ïalehkai naduh ki jingtei ïa ki jaka ialehkai bapher bapher, ki jaka kiba la dep tei bad baroh ki jingpynkhreh ba nadong shadong.
Haba ai ka jingïaroh ïa u Myntri Rangbah ka jylla u Conrad Sangma, u Mandaviya u la ong “ Ka jylla ka la sakhi ïa ka jingkiew sted ka kam ïalehkai ha kine ki phra snem ba la leit noh hapoh ka jingïalam jong une Myntri Rangbah. U la pynpaw ruh ba un shim khia bha ban kyntiew shuh shuh ïa ka kam ialehkai ha Meghalaya da kaba pynbiang ïa ki jingdonkam kat kum kane ka juk kaba mynta.
U la ong haba ka jylla Meghalaya ka nud ban wan shakhmat ban pan pynlong ïa kane ka National Games, ka long ka jingsarong da shisha ïa ka ri bad ka jaidbynriew. Hadien ba u la dep bishar bniah ïaki jingpynkhreh pynkhrum na ka bynta kane ka National Games 2027 u la ong “ Nga nud ban ong ba kane ka lympung ïalehkai kan long kum ka Nongmuna ïa kiwei ki jylla hadien habud”.