Na u Myntri sorkar, dawa ki nongri Sniang ban pynsangeh ïa ki Sniang ba wan na shabar ka jylla

Nongpoh, Ïaiong 26: Haba leit ban pynsngew sha u myntri sorkar ka jylla halor shibun ki jingeh jong ki nongri sniang hapoh ka jylla, ki Nongri syniang na ka jylla ha ka lama jong ka Meghalaya Pig Farmer Association ki la dawa syndon na ka sorkar ba dei ban pynsangeh noh ïa ka jingwan shalan ïa ki sniang na shabar ka jylla sha kane ka jylla Meghalaya.
Ki nongïalam ka Meghalaya Pig Farmer Association ha ka jingïalam u Bah Ioanis Lyngdoh kum y Chairman lem bad kiwei ki nongïalam hynnin ka sngi ki la leit ban ïa kynduh ïa u Bah A.L Hek Myntri ba dei peit ïa ka tnad Animal husbandry and Veterinary ban aiti ïa ka dorkhas ba ki la pynsngew halor shibun ki mat kiba ki ïa kynduh jingeh kum ki nongri sniang hapoh ka jylla.
Kine ki nongïalam nalor ba ki la aiti ïa ka dorkhas sha u myntri ba dei peit ïa kam ri jingri, ki la ioh lat ruh ban pynsngew ïa ka jingangnud jong ka seng ban wan rah ïa kata ka jingkylla halor kam ri sniang ban myntoi ki nongri sniang hapoh ka jylla.
Kawei na ka phang kaba ki la ban khia ruh ka dei ka jingkyrpad ïaka sorkar ban sangeh noh ka jingwan rah sniang na kiwei ki jylla sha kane ka jylla, ba kane ka ktah ïa ki nongri sniang khamtam ka jingma lyngba ka jingsaphriang kata ka jingpang African Swine Fever (ASF) kaba ktah kylla ïa ki sniang ba la ri da ki nongrep ka jylla.
Shuh shuh, kiwei kiwei kiba ki la ïa kren ba kynthup hapoh katei ka dorkhas ki kynthup ban thaw ki lad ki lynti ban ïarap kyrpang ïa ki nongri sniang ka jylla, ban thaw lad ban wan rah ïa ka iew ka hat kyrpang hapoh ka jylla, ha kaba kitei ki nongïalam ki la pynpaw ka jingsngewkmen ba utei u myntri sorkar u la ai ka jingkular ban shim khia halor kine ki jingeh jong ki nongri sniang ka jylla.