Nongpoh, Lber 06: Nalor kiwei kiwei ki kam pynroi ba ki paidbah ki donkam ha Ri Bhoi, u MLA ka Nongpoh Constituency, u Bah Mayral Born Syiem u la buh syndon ïa ka jingkyrpad na u myntri rangbah ka jylla ban pynsted noh ïa ki kam ïa pynbeit pud ha ki bynta ba dang dang hap ha Ri Bhoi bad wat ha kiwei kiwei ki jaka ïa kajia pud hapdeng ka Assam bad ka Meghalaya.
U MLA ka Nongpoh, u Bah Mayral Born Syiem ula ioh lad ruh ban pynsngew na ka bynta ki kam pynbeit pud kiba dang sahteng ha pud u sam ka Ri Bhoi District, ka dei ha ka jingïalang hynnin ka sngi kaba u myntri rangbah ka jylla, u Conrad K. Sangma u la wan ban buh ïa u Mawnongrim na ka bynta ban shna ïa ka madan plastic (Artificial turf) ha ka madan Umbuda ha Ri Bhoi District.
Na ka liang u MLA ka Nongpoh, ha kane ka sngi u la pynsngew ruh ba ki dang don sa saw tylli ki jaka ba dang ïa kajia pud hapdeng ka Assam ba la donkam ban pyndep noh ïa kane ka kam ïa pynbeit pud kiba kynthup ïa ka Nongwah Mawtamur Deshdomriah, Borduar bad ka Block II khnang ba lada dep ban ïa pynbeit ïa ki kam pud ki kam sam kan long ka jingmyntoi ïa ki paidbah ha ki thaiñ khappud.
Kum u MLA ka nongrpoh Constituency, u Bah Mayral Born Syiem, nalor kitei ki kam pud ki kam sam, u la shim kabu ruh ban ban pynsngew ïa shibun ki mat ha khmat u myntri rangbah ka jylla ba kynthup ruh ban plie noh ïa ka Trauma Centre ha Civil Hospital Nongpoh, ban wan rah ïa ka 132 KV power grid substation, ka surok na Nongpoh sha Sonapur bad kiwei kiwei ki kam pynroi kiba donkam ha Ri Bhoi.
Shuh shuh, ha kane ka sngi, hadien ba la pynsngew da u MLA ka Nongpoh halor kitei ki phang ba ka sorkar kan shim khia ban pyndep na ka bynta ka jingmyntoi ki paidbah, u Myntri rangbah ka jylla ruh u la kular ban shim khia ban pynurlong ïa kitei ki jingdonkam ki paidbah hapoh ka them Ri Bhoi.
