Nongpoh, Jymmang 03: Hadien ka jingïoh jingtip kaba thikna halor ka jingdon jong uwei u nongkhaii drok bala tip kyrteng kum u Wellborn Khongjoh ba kju khot sin u Bull, u dang don ha lynti bad 2 ngut ki wei pat ki paralok ban kiew na Nongpoh sha Nongbah Shillong, ki pulit jong ka Ri-Bhoi hynnin ka miet kila pynlong ka jingpynap shrip ha Umsning haka por kumba 9:45 baje eiei mynmiet.
Ha katei ka jingpynap shrip, ki pulit ka Ri-Bhoi kila ïoh ruh ban bat ïa kawei ka kali Baleno kaba don ïa u Registration Number ML 05 AB 9902 kaba dang kiew na Nongpoh sha nongbah Shillong ha Nongthymmai Umsning.
Haka jingtalasi jong ki pulit ki pulit kila ïoh bat 3 ngut ki briew ba kynthup ïa u Wellborn Khongjoh na Kynjoin Umran, u Fedrick Kharkrang bad u Pascal Kharkrang na ka shnong Shangbangla Ri-Bhoi District ryngkat u drok bala suba ba u dei u Heroine ba don kumba 10.9 Gram.
Ki pulit kila kem noh ïa kitei ki 3 ngut bad ka jingtohkit ka dang ïaid shakhmat ban lap shuh shuh ïa kiwei ba donkti.
