Nongpoh, Jymmang 03: Ka Dorbar Raid Nongpoh ha ka jingïalam u Lyngdoh u Bah Linus Lyngdoh ka la pynpaw ïa ka jingsngewkhia hadien ba ki la ïoh pdiang shibun ki jingujor na ki paidbah, kaba dei halor ka jingpynjot dusmon ïa ka khlaw Raid kaba don ha Nongpoh bad mynta ka sngi ki la mih shakhmat ban maham jur na ka bynta ban khang pyrshah ïa ka kam rep kam riang bad ka jingpynjot pathar ïa ki khlaw kiba hap hapoh u pud u sam ka Raid Nongpoh.
Haba kren mynta ka sngi sha ki lad pathai khubor, u Bah Linus Lyngdoh kum u Lyngdoh ka Raid Nongpoh u la pynpaw ïa ka mynsiem jong ka jingsngewkhia kaba jur halor ka jingrep jingriang, ka jingpom pathar ïa ki dieng ki siej bad ka jingleh dusmon ki riew shim kabu ïa ka khalw kaba la pynlong ïa katei ka khlaw Raid ba kan syllen bad tyrkhong kaba la buh jingma ruh ïa ki mrad kiba im ha katei ka khlaw bad kaba long ruh ka daw ka jingrngad ki tyllong umbam umdih.
U la ïathuh ruh ba ha kine ki khyndiat sngi ka Raid ka la pynlong ïa ka jingïalang kaba kyrkieh ban kren halor kane ka kam ba ka Raid naduh mynta u snem 2025 ka la khang pyrshah sha baroh ki nongrep ba kim dei shuh ban thung kwai, synsar bad u siej kumba ka Dorbar Raid ka la dep ban khang ha ki snem ba la leit noh.
U la ong ruh ba ka Raid nangne shakhmat ka la rai ban nym ithuh shuh ïa ki nongrep kiba leit rep khlem ka jingthoh jingtar na ka Raid bad kino kino kiba rep ki dei ban ïoh jingthoh na ka Raid bad ryngkat ka jingheh jong ka jaka rep kaba ki rep khnang ban lait na ka jingkyntur jaka bad lada ki donkam ban pynshisha ne pynthymmai ki dei ban wan pyntip sha ka ophis jong ka Raid.
U Bah Linus Lyngdoh kum u Lyngdoh u la pyntip paidbah ba ka Raid ka la rai ban khang ïa ka jingïadie ïa thied jaka hapoh katei ka khlaw Raid ba la tip kum kata ka die syrlei bad ruh la khang ban ai pateng ne ai wai sha kiwei ïa ki lum bad kita ki lyngkha rep kaba ki pynlong kum kata ka kam khaïi hapoh katei ka khlaw Raid.
Ka Raid ka la maham tyngeh ruh ïa kito ki riew shim kabu kiba pynjot dusmon ïa ka mei mariang da kaba pom pathar ïa ki dieng ki siej bad lada ka Raid ka dang lap nangne shakhmat kan shim da ka lad kaba tyngeh ban pynshitom ïa kum kitei ki jaid briew.
Namarkata, U Bah Linus Lyngdoh u la ong ba ha ka Ri Raid, ki paidbah ki lah tang ban rep ban riang kaba dei lyngba ka jingtip ka Dorbar Raid bad kin nym lah pat ban kam trai ïa ki jaka kaba ki rep. u la kyntu ruh ïa ki paidbah nongrep ba ki dei ban bud ryntih ïa ki hukum ba la pyntreikam da ka Raid bad ruh ban ai ka jingïatrei lang na ka bynta ka jingbha bad ka jingmyntoi lang jong baroh hapoh kane ka khlaw Raid, u la bynrap
