U Blei Uba dap da ka jingieid, “ngi ieid thoiñ thoiñ ïa la ka tynrai lajong watla long Khristan

Babu Kenneth Shadap

Ka jingkyntu halor ka jingïalong kawei jong ki Khasi Pnar: Ka jaitbynriew Khasi ne Hynñiewtrep kaba kynthup ïa u Khynriam, u Pnar, u Bhoi, u War, u Lyngngam, u paid Khasi baïar, ka Ri Khasi ka la ïoh ïa ka nam ka burom kum ka jaidbynriew tip briew tip Blei, tip hok tip sot, U Blei Uba shisha U hikai ïa ka jingïaieid markylliang, ka jingïarap lem markylliang, ka jingïasngewlem markylliang, ka jingïaleh sbun markylliang bad khamtam eh ka jingïarap markylliang, naba ka jingïashun ka jingïa isih parabriew, ka jingïawaddong waddaw iwei ïa iwei pat kam wan na U Blei, naba U Blei U long ka Jingieid.
Te ma nga kum u Khasi uba ieid shisha ïa ka jaidbynriew nga buh kane ka jingkyrpad da ka jingieid bad jingburom ïa ka Seng Khasi, Niam Tre ba kin sngewbha ban ïa ieid bad burom lem mar kylliang, ïa baroh ki paid Khasi Khara kiba long Khristan, la ka dei ïa ki Katholik, ne ha kino kino ki Balang.
Lehse ha ka rukom shad Khasi tynrai da ki Khristan Katholik ka don ka jingbakla, ha ka riam ka beit ne ha ka rukom rwai, nga shim ïa kane ka lad ban pynsngew sha ki nongïalam jong ka Seng Khasi ne Niam Tre ban ïa pyni bad hikai lem keiñ da ka jingieid bad kane keiñ nga sngew ba U Blei ka Jingieid U kwah ïa ngi iwei pa iwei.
Ngi baroh ki Khristan Katholik la ngi la long Khristan, hynrei ngi ieid thoiñ thoiñ ïa la ka jong ka jaidbynriew Khasi, ka tynrai ka rukom, la ka dei ha ka ktien ka thylliej, ka riam ka beit, ka put ka tem, ka rwai ka shad bad ngi thrang bad ngi angnud ban pynneh pynsah ïa la ka jong ka riti ka dustur.
Nga duwai naduh ka dohnud ba U Blei ka jingieid Un teh song ïa ngi kum ka jaidbynriew Hynñiewtrep Hynñiewskum. Ka don ka jingong, “haba nga leh ïa kaei kaei da ka jingieid watla nga bakla ha ka rukom leh U Blei U map namar U Blei Um peit bad thew ïa kaba shabar hynrei U peit ïa ka dohnud ba shapoh jong u briew.”