Shillong, Lber 05 : Na ki 19 ngut ki MDC jong ka Khasi Hills Autonomous District Council kiba aireng ha kane ka elekshon MLA 2023 kaba dang shu lah shen, ki don pat tang san ngut kiba poi sha ka thong, kata lai ngut na ka Congress bad arngut na ka UDP.
Ki MDC ba jop na ka Congress ki kynthup ïa u MDC ka Mylliem Bah RV Lyngdoh, MDC ka Nongstoin Bah Gabriel Wahlang bad u Bah Charles Marngar MDC ka Mawhati. Katba ki MDC ba jop na ka UDP pat ki kynthup ïa u Bah Paul Lyngdoh na Shillong West bad Bah Pius Marwein na Ranikor.
Kumban shu kdew hangne, ki kyrtong kiba aireng ha kane ka elekshon ki kynthup ruh ïa u CEM ka Council, Bah Titos W Chyne kyrtong ka UDP na Sohra uba la shah rem noh ha u kyrtong ka PDF Bah Gavin Mylliem.
Lada ïaid katkum ka party da kaba sdang shwa na ka NPP, kiwei pat ki MDC kiba shah rem ki kynthup ïa u Bah Gigur Myrthong na Mawshynrut, nangta Bah Alvin Khyriem na Mawsynram, Bah Pynïaid Sing Syiem na Sohryngkham, Kong Macdalyn Sawkmie Mawlong MDC ka Umsning ba ïakhun na Nongpoh, Kong Grace Kharpuri MDC ka Nongshken ba ïakhun na Shella bad Bah Teibor Pathaw MDC ka Mawlai.
Na ki MDC ka UDP pat ki ba shah rem ki kynthup ïa u Bah Titos Chyne na Sohra, Bah Mitchel Wankhar MDC ka Laban na Mylliem, Bah Lambor Malngïang na Nongkrem.
Na ki MDC Congress kiba mad ïa ka jingshah rem ki kynthup ïa u Bah Batskhem Ryntathiang na Mairang, Bah PN Syiem na Pynthorumkhrah bad Bah Carness Sohshang na Mawkyrwat.
Kiwei pat ki MDC kiba aireng bad shah rem ki kynthup ïa u Bah Martle N Mukhim MDC ka Mawkynrew bad Bah Bindo M Lanong, MDC shu sieh uba ïakhun na Nongkrem.
Lah ruh ban kdew hangne ba ka NPP ka la pynieng haduh 6 ngut ki MDC hynrei khlem don ba jop iwei ruh, ka UDP ka pynieng 5 ngut ki MDC ka jop 2 ngut, ka Congress ruh ka pynieng 6 ngut ki MDC bad jop lai ngut.
