Shillong, Lber, 05: Ka North-Eastern Hill University, Shillong ka la ai khublei ïa ka kynhun Yuva Sangam na ka jylla Uttar Pradesh kiba la wan jngoh ïa ka jylla Meghalaya lai sngi kynthih.
Kane ka kynhun kaba kynthup ïa ki 60 ngut ki samla pule bad ki nonghikai na ka jylla Uttar Pradesh hapoh ka jingïalam jong ka Babasaheb Bhimrao Ambedkar University, Lucknow ki la wan poi ha Meghalaya ha ka 28 tarik, Rymphang.
La pynlong ruh ïa ka jingïalang ban ïasam jingtip halor ki jingjop, ki kam jngohkai pyrthei, ka riti ka dustur, ka kolshor bad ka jingïadei hapdeng ki phra tylli ki jylla ka thaiñ Shatei Lammihngi bad kiwei kiwei ki jylla ka dewbah India.
Kane ka kynhun ka la leit jngoh ruh ïa ka Raj Bhavan bad ïohlad ban ïakren bad u Lat ka Jylla halor ka phang ‘Ek Bharat Shrestha Bharat Mission.”
“Nga sngewkmen ban ïasam ïa kane ka kabu bad phi kumba ngi tip baroh ïa ka jingïar jong ka thaiñ shatei lammihngi ka ri India, nalor ba ka long kaba riewspah bad kaba don bun jait ki riti ki dustur bad ka lariti. Ka long kaba sngewsih ba tang khyndiat eh na ka dewbah India ki tip shaphang kane ka thaiñ,” ong u Lat ka Jylla u Phagu Chauhan haba kren sha kane ka kynhun.
“Ka ladei ka por ban don ka jingïasam jingtip jong ka Yuva Sangam hapoh ka jingïalam jong u Myntri Rangbahduh jong ngi u Narendra Modi ban ïarap ïa ka ri India ba kan tip kham bha shaphang ka kolshor bad ka riti ka dustur jong ka thaiñ shatei lammihngi, u la ong.
U Commissioner & Secretary sha ka ophis jong u Lat ka Jylla u Dr. B. D. R. Tiwari u la ïathuh bniah shaphang ka jinglong jingman jong ka jylla Meghalaya.
Haba kren shaphang ka riti ka dustur ha Meghalaya, u la ong ba ka Meghalaya ka dei ka jylla kaba ai jait kmie bad ïa ka ing ka sem la pynïaid da ka kmie ïa kaba ym pat ju ïohi ha kano kano ka bynta jong ka pyrthei. U la kyntu ïa ki samla pule jong ka jylla Uttar Pradesh ban khmih thuh ïa ka jinglong jingman jong ka jaka, ka kolshor, ka jingbha mynsiem bad ka jingleh khuid jong ki paidbah ka jylla Meghalaya bad kumno ki lehkhuid ïa ki sawdong sawkhun haba ai nuksa da ka shnogn Mawlynnong bad ong ruh ba ki dei ban rah ïa kane ka nuksa na Meghalaya sha Uttar Pradesh.
U Prof. Prabha Shankar Shukla, uba long u Vice-Chancellor jong ka NEHU u la ong, “ka lawei jong ka ri ka shong ha ka kti jong ki samla jong ka ri bad dei ki samla jong ka ri kiba lah ban wanrah ïa ki jingkylla na ka ri kaba duk sha ka ri kaba kiew irat.
Ha ka por shiteng sngi, ki samla pule ki la ïashim bynta sa ha ka jingïalehkai sports bad ka jingpyni nam ïa ki kolshor ha ka por janmiet.
Kane ka kynhun ka la pynpaw ruh ïa ka jingsngewkmen da kaba ong, ba kin ap sa ïa ka jingpoi jong ki samla ka jylla Meghalaya ha ka 10 tarik mynta u bnai ha ka jylla Uttar Pradesh.
Ha kane ka jingïalang ba la pynlong da ka NEHU Yuva Sangam la pynkup burom ruh ïa ka Silvi Passah, kaba la long ka khasi kaba nyngkong eh ban prat lynti ïa ka jinghikai Hindi bad ïa u Bah Risingbor Kurkalang, uba long u nongïoh pdiang ïa ka Padmashree Awardee na Meghalaya.
