Na ka tiket VPP, leit hep kyrteng u bah Damewanhi Rymbai ban iakhun na Khliehriat Constituency

Khliehriat rymphang 4 :U bah Damewanhi Rymbai, uba dei u kyrtong (candidate ) jong ka Voice of the People (VPP), u ban ïakhun ïa ka Meghalaya Legislative Assembly Election 2023 na ka, Khliehriat Constituency, mynta ka sngi u la wan ban thep kyrteng ha u Returning Officer ha ophis u Deputy Commissioner ha Khliehriat.
Katto katne shaphang u bah Damewanhi Rymbai, u dei uba shong ba sah ha ka shnong Wapungskur, East Jaiñtia Hills District, kane ka dei ka synjam kaba nyngkong jong u ban ia don bynta ha ka kam saiñ hima, sima bad shakri ïa ki paidbah bad ka thong kaba hakhmat eh ka long ban wanrah ïa ka khuid ka suba ha ka kam saiñ hima sima ha ka synshar ka khadar (Clean Politic).
Haba kren sah ki pathai khubor, utei u kyrtong jong ka Khliehriat Consti tuency, u la pynpaw ba “ Ka thong jong nga ka long ban kyntiew ïa ka ïoh ka kot hapoh ka district, kumba nga ïohi bad ïa sakhi lang hi ba ka district jong ngi ka dei ka district kaba riewspah, kaba bun bha ka lad pynmih pisa lane ka revenue kaba na ki mar poh khyndew, hynrei na ka jingbymbiang ka rukom pyniaid , bym biang ki nongmihkhmat na kata ka daw ym lah ban kyntiew shaphrang ïa kane ka district ha kaba ïadei bad ka ïoh ka kot” u la kyntu bad kyrpad ruh ïa ki paidbah jong ka 6-Khliehriat Constituency ba kin sngewbha ban ailad ïa u mynta shi sien ban kyrshan ïa u ban shon ha ka shap jong u Prah khnang ban dup lah ban wanrah ïa ka jingkylla ha ka thaiñ “Na ka liang ka VPP ngi buh ïa ka thong kaba hakhmat eh ban wanrah ïa ka jingkylla ha kaba ïadei bad ka ka mat ban pynkhuid ïa ka synshar ka khadar ha kane ka jylla Meghalaya.”