Na ka Tamasa shad Lakhempong ha Ummat, paw ba ka Raid Nongtung ba ka dang riewspah ïa ki riti ki dustur

0

Nongpoh, Ïaiong 23: Ka Raid Nongtung ba hap ha ka Hima Khyriem ryngkat ka jingïatrei lang bad ka Synjuk ki Rangbah Shnong Raid Nongtung Border Area lem bad ka RBYF Raid Nongtung Circle ki la lah ban pynkut noh ïa kawei naka Tamasa tynrai ba ar sngi ba la tip kum ka ‘Shad Lakhempong’ kawei na ka jingshad tynrai jongka Raid Nongtung ba ha kane ka tamsa ki mih lut ki riti ki dustur bad ki kolshor jong ka Raid.
Kum ban pynkynmaw, ïa kane ka Tamasa Shada Lakhempong ba ar sngi la sdang naduh ka 21 tarik u Ïaiong 2023 bad la pynkut noh ha ka 22 tarik u Ïaiong 2023 ha ka Madan jong ka Shnong Ummat, kawei na ka nongbah buh maw shyieng ka Raid Nongtung ba haduh kine ki snig ki dang burom bad ki dang leh ïa kata ka niam ka rukom tynrai katkum ki riti ki dustur jong ka Raid Nongtung.
Haba pynhap pyrda noh ïa kane ka Shad Lakhempong ka Raid Nongtung la wan shim bynta da u Syiem Khynnah ka Hima Khyriem ha ryngkat ka jingdon lang u Syiem ka Raid Nongtung, u Paiem Miwel Shadap, u President ka Synjuk ki Rangbah Shnong Raid Nongtung Border Area, u Bah Blikshon Sohtun, ki longsan ki mansan ka Raid bad ryngkat ki khun ki hajar jong ka Raid Nongtung.
Kumba la sakhi ha kine ki ar sngi, da ka jingdon kane ka Shad Lakhempong la iohi ruh ba ki khun ki hajar ki la wan shim bynta shitrhem ban ïa snoh kti lang bad ka Raid bad khatam ki jingshad tynrai bad ka leh niam tynrai la pynpaw ha kane ka lympung, kaba long shi bynta ban pynneh pynsah ïa ki riti ki dustur jong ka Raid Nongtung.
Nalor ka leh niam ka leh rukom bad ka jingdon kiwei kiwei ki jingshad tynrai, ka jingshad tynrai kaba kham pynshongshit bad ai mynsiem ha kane ka Tamasa ka dei ka Shad Lakhempong, ha kaba ha kane ka jingshad tynrai la shim bynta da ki khun samla kynthei bad shynrang napoh ka Raid Nongtung bad katkum ka riti ka dustur ha kane ka shad Lakhempong la ïathuh ruh dei tang ki rang bad ki thei soti kiba lah ba shim bynta.
Ha kane ka sngi, u Syiem khynnah ka Hima Khyriem kum u kongsan u la ai jingïaroh ruh ïa ka Raid Nongtung, ki khun ki hajar bad kumjuh ruh kito kiba la ïa snoh kti ban pynlong ïa kane ka shad tynrai bad kane ka jingshad tynrai ka dei kawei na ka saindur ba kum ki khun ki hajar kim dei ban klet ïa la ka tynrai bad ki dei ban tip ïa la ka tynrai, kaba long ka pdeng jong ka jaid bynriew.
U la kyntu ruh ïa ki khun ki hajar ba ki dei ban sngew sarong katba ngi dang tip ïa la ka tynrai, namar kano kano ka jaid bynriew ka don la ka jong ka tynrai bad haba don ka tynrai ngi dei kita ki jaid bynriew kiba im ba kiba dang kiew ha ki liang baroh, u la bynrap.
Na ka liang u Paiem Miwel Shadap ruh u la pynshai paidbah ba ka jingthmu jong kane ka Shad Lakhempong ka long ban pynneh pynsah ïa ki riti ki dustur bad ka jinglong tynrai hapoh ka Raid Nongtung. Kane ka shad Lakhempong ka dei kawei na ka jingshad tynrai ba la ïalam da ki Longshuwa ki manshuwa kum shi bynta ban pynriew spah ïa la ka riti ka dustur bad dei namar kane ka daw la pynlong ïa kane ka jingshad man la u snem khnang ba ngin lah ban pynneh pynsah ïa la ka riti ka dustur bad ym ban shu bud tynneng ïa ki riti ki dustur jong kiwei khlem da tip ïa la ka jong ka tynrai, u la bynrap.

Leave A Reply

Your email address will not be published.