Jowai, Ïaïong 23: Ka Rotary Club Jowai kumba ju leh manla u snem ha kane ka sngi saitjaiñ kala pynlong ïa ka jingpynkup burom ïa ar ngut ki riew don sap ba kyrpang kiba kynthup ïa u Gilford Pde bad ïa u Tariangmon Lamat.
Ïa kane ka jingïalang la pynlong ha Infinity Hall, Mooralong ha kaba u ma Lamphrang Pohktai, Divisional Soil & Water Conservation Officer, West Jaiñtia Hills Jowai Plantation Crops Jowai, Division ula long kum u kongsan, ha ka jingdonlang ka Chartered President Rtn. E.F. Gatphoh (MPHF), Rtn. S.K. Lato (MPHF), Rtn. D.F. Majaw, Charter Member (PHF) bad kiwei de ki Rotarian.
La pynïaid ïa kane ka jingïalang da u Rtn. Samehi Laloo, President Rotary Club Jowai bad la ïoh ruh ka jingrwai National Anthem bad pule ïa ka Soskular jong ka Rotary da baroh ki Rotarian katba u Rtn. S.K.Lato (MPHF) ula ai ki kyntien pdiang burom.
La pynsngew ruh ha kane ka sngi shaphang ki kam jong ka Rotary Club of International bad kymjuh shaphang ka jingai khusnam sha kitei ki ar ngut da u Reuveny Nongtdu, Director Vocational Service bad kumjuh ruh shaphang u Gilford Pde na ka dong Chilliangraij, Jowai uwei na ki nongot dur ha ki dien (Sculpture) bad u Tariangmon Lamat u nongai jingsumar da ki dawai tynrai (Traditional Practitioner Herbal) na ka thaiñ Amlarem.
U Lamphrang Pohktai, Divisional Soil & Water Conservation Officer, West Jaiñtia Hills, Jowai Plantation Crops Jowai, Division ha ka jingkren ula pynpaw ka jingsngewnguh kaba khraw ïa ka Rotary Club Jowai kaba la shim ïa kane ka bynta ban ai mynsiem ïa kiwei ban kim kiew shaphrang lyngba kane ka jingai khusnam.
Ula kitbok ïa kane ka seng treimon sngewbah ha ka imlang ka sahlang ban kan dang lah ban ai ka jingshakri kaba bha tam ha kine ki sngi ban wan, ha kane ka jingïalang la ïoh ïa ki kyntien ai khublei da u Rtn. Deibormi Toi, President Elect Rotary Club Jowai.
