‘Mih ïew’ ki khun ka Seiñ Raij Jowai ban lehkmen ïa ka Shad Sukra

Jowai, Ïaïong 23: Ki khun ka Seiñ Raij Jowai mynta ka sngi ki la mih madan ban pynlong ïa jinglehkmen ‘Shad Sukra’ ba shisien shisnem, hashwa ba ki khun ki hajar kin hiar leit rep sha ki hali ki pynthor ban bet ïa u symbai u kba da ka jingkyrmen ban ïoh kheit ïa u kba uba sei soh.
Ka phang jong kane ka Shad Sukra mynta u snem 2023 ka ong “Chaniah tylli heimon mi Blai, kam wa pynkhroo iei wada dep booh mi ha pyrthai” bad ïa kane ka Shad Sukra la pynïaid da ka Arts & Culture Committee jong ka Seiñ Raij Jowai.
La sdang ïa kane ka Shad Sukra naduh hynnin ka sngi ha la ki jong ki jong ki dong ki shnat da kaba pynlong ïa ki jinglehkai drama bad mynta ka sngi kaba dei ka sngi “mih ïew”, ki khun ka Raij Jowai naduh ki longkmie ki longkpa, ki khun samla bad ki hep kiba rit ki la mih ryngkat ki riam ki biet ba itynnad bad ba iphuh iphieng.
La ïathuh ba kane ka Shad Sukra ka long kum ka por ban ai bam ai dih, ka por kaba bsa ba pjah ïa u khun bynriew lyngba ka jingdon jingem ha ka mei mariang kaba pyndap pynbiang ha baroh ki saw aiom, la ong ruh lyngba kane ka shad sukra kan wanrah ruh ïa ka jingïaieit, ka jingïatylli para nongshong shnong.
Kane ka Shah Sukra ka long ruh shi bynta na ka lad ban sei ïa ki sap ki phong naduh ka rwai ka siaw bad ka shad ka kmen, la pynsngew ruh ba ka Shad Sukra ka dei ka lad ban pynpaw pyrthei ïa ka jingphuh jingphieng bad jingriewspah jong ka Riti ka Dustur ki khun u Hynñiewtrep Hynñiewskum.
Ha Madan Mynkoi Pyrdi Loompydi Ïongpiah Jowai la sdang ïa ka Shad Sukra ha ka por 10 baje ha kaba la don ka jingkren pdiang sngewbha da u Hambiness Passah Vice-President ka Seiñ Raij Jowai, ha kaba u kongsan jong kane ka sngi uba dei u MLA ka 2-Jowia ma Wailadmiki Shylla. Hangne la ïashim bynta ïa ka jingshad Sukra da ki 14 tylli ki kynhun na ki seiñ Raij bad ki don bapher bapher.
Hadien kane kila leit mih shad ha Madan Biar ka Blai (Mission Compound) bad leit mih Iawmusiang, ha kaba la pynïaid ïa ka prokram da u ma O. R. Shallam President ka Seiñ Raij Jowai, ha kaba u ma Comingone Ymbon ba dei peit ïa ka tnad Cooperation Department, Food Civil Supplies & Consumer Affairs Department bad kiwei de ula long kum u kongsan.
Haba ai jingkren u ma Ymbon ula ai khublei ïa ki nongïalam ka Seiñ Raij kiba la lah ban pynlong ïa kane ka prokram Shad Sukra kaba phuh ba phieng kaba long kum shi bynta ban pynneh pynsah ïa ka Riti ka Dustur.
Ula pynpaw ka jingsngewkmen ban ïadon bynta lang ha kane ka sngi da kaba kitbok ïa ki khun ka seiñ raij ba kin nangïoh ïa ka jingkoit jingkhiah lyngba kane ka shad sukr.,
“Kum ki khun bynriew dei ban burom ïa ka mei mariang namar kiba bun ki lum ki wah kiba syllen lut na ka jingpom pathar ïa ki dieng ki siej bad pynjulor ïa ki um ki wah”. Kumta u kyntu dei ban pynneh pynsah ïa ka mariang da ka pynduh pyndam shi syndon ïa ka jingthang khlaw namar kumba ïohi mynta ka jingkiew ka jingshit kala jur shaba palat.
U ma O.R Shallam ula kyntu ba dei ban burom ïa ka mei mariang da kaba pynlong ka jingthung dieng da uwei pa uwei u nongshong shnong ka bri u Hynñiewtrep hynñiewskum, da kaba u ong ba ka jingthmu jong ka Shad Sukra mynta ka snem ka long ban pynjyrngam biang ïa ka mei mariang ban ïoh ïa ka jingkhuid jingsuba ha baroh ki liang.
Ha Ïawmusiang kiba ïashim bynta ha ka jingshad ki kynthup ïaka WWO,SRJ, Iawmusiang, Seiñ tylli lang, Seiñraij Ummulong, Seiñraij Shillong, Iongpiah, Loomkyrwiang, Dulong, Loomïongkjam, Seinraij Raliang, Tpep-Pale, Umchangiar, Chilliangraij bad ka Panaliar.
La pynkut ïa kane ka sngi ha Mynkoi Pyrdi Iongpiah Jowai ha kaba por 8 baje mynmiet da kaba pynlong ïa ka jingshad ki jingpynbyrngia ba la shim bynta da ki dong bapher bapher kiba hap hapoh ka Seiñ Raij Jowai.