Nongpoh, Ïaiong 23: Ban kner ïa ka jingshakri sha man la ki shnong ki thaw hapoh ka them Ri Bhoi na ka bynta ka eh ka shon ki paidbah, ka Confederation of Ri Bhoi People (CoRP) ha ka sngi Saitjaiñ ka la lah ban pynkha sa ïa kawei ka tnad treikam ba la tip kum ka CoRP Ronghalam Unit hapoh ka ka them Ri Bhoi.
Ïa kine ki nongïalam jong kane ka Unit la wan ban pynskhem da u President ba rangbah ka seng, u Bah Bandari Ryntathiang ryngkat ka jingdon lang u Working President, u Bah Pateng Myrsing lem bad kiwei kiwei ki nongïalam ka CoRP.
Kitei ki nongïalam ba la shah pynskhem ha ka CoRP Ronghalam Unit ki kynthup ïa u President ba la jied ïa u Bah Alfred Ingti kum u President, Clement Hanse kum u Vice President, Roming Lapang, General Secretary ryngkat kiwei ki nongïalam bad ki dkhot kane ka Unit.
Na ka liang u President, u Bah Bandari Ryntathiang haba pynskhem bad pynbam smai ïa kitei ki nongïalam ka Unit, u la ai ka jingkyrkhu kyrdoh ïa kine ki nongïalam bad ryngkat ki kyntien sneng ki kyntien kraw ba kin shim ïa kata ka jingkitkhlieh kum kita ki nongïalam ym ban trei na ka bynta ka jingmyntoi shimet, hynrei ban trei na ka bynta ka eh ka shon jong ki paidbah ba ka nongrim jong ka seng ka long ban ai kata ka jingshakri na ka bynta ka bha ka miat bad ka roi ka par jong ki paidbah ha ka District hi baroh kawei.
