Nongpoh, Ïaiong 23: Ban pynneh pynsah ïa ka rukom sumar tynrai bad ka jingai dawai tynrai na ka bynta ki jingpang jingshitom bapher bapher kumba la sap kyrpang da u Blei, ka sorkar jylla lyngba ka tnad Planning ryngkat ka jingïatrei lang ki nongsumar tynrai ki la rai ban plie ïa kawei ka jaka ai jingsumar ba la tip kum ka Meghalaya Bio-Resources Development Centre ha ka Shnong Pahamsyiem ha Ri Bhoi.
Haba pyntreikam ïa kane ka jaka ai dawai ne sumar tynrai na k abynta kiba pang ba shitom yn ptntrei kam ryngkat ka Autonomous Research & Development Institution lyngba ka tnad Planning bad ka Ri Bhoi Traditional Healers Association.
Halor kane ka jingthmu ka sorkar ban plie ne pyntreikam noh ïa katei ka jaka ai jingsumar tynrai la pyntip da u District Planning Officer ka Ri Bhoi District. Kumba la pynpaw da utei u ophisar, ka jingthmu ban plie ïa kane ka jaka ai jingsumar ka long shi bynta ban pynneh pynsah ïa ka sap ka phong kyrpang jong ki nongsumar tynrai bad ruh ban pynneh pynsah ïa ki dawai tynrai kiba ngi lah ban ioh na ka jylla.
“Da ka jingdon katei ka jaka ai jingsumar tynrai, kin pyrshang ruh ban pynbit pynbiang naduh ka jingsumar bad kumjuh ruh ka jingkhleh dawai kiba dei katkum ka juk stad ba mynta” pynpaw u ophisar ha ka kyrwoh bad bynrap ruh ban dang kyntiew ïa kane ka jingsumar tynrai kumba la ai sap kyrpang da u Blei ïa kiba bun ki nongsumar tynrai hapoh ka jylla” u la bynrap.
Shuh shuh, u la pyntip ruh ka jingdon kane ka Meghalaya Bio-Research Development Centre kam dei satia tang ban pynneh pynsah ïa ki dawai kymbat bad ka jingsumar tynrai ba la ïalam da ki longshuwa ki manshuwa, hynrei kane ka dei ruh ka thong ba ka sorkar ka kwah ban kyntiew ïa kito ki nongsumar tynrai ba kin pyndonkam hok ïa ka sap ka phong ba la ai da u Blei bad ha kajuh ka por ruh kan long kum kawei na ka lad ai kam ai jam ban kyntiew ïa ka ioh ka kot jongki lyngba kane ka jingsumar tynrai, u la bynrap.
