T. 63 klur tam pynïoh pisa u MLA ka Mawshynrut Constitunecy ban pynpoi ïa ka surok haduh Maweit

By Mawphor News Desk On Apr 24, 2023

Nongstoiñ, Ïaïong, 23: La bun bun phew snem ki paitbah ka thaiñ Maweit, ki la angnud ban don noh da ka surok kaba bha naduh Nongstoiñ bad ha u snem ba la dep, ka sorkar MDA ka la pynurlong ha kaba ka la mang pisa na ka bynta ban pynbha bad siang rong ïa katei ka surok bad ka jingtrei ka la ïaid shait shait naduh ki bnai ba la dep. Hynrei katei ka jingpynbha bad siang rong ïa katei ka surok, kam shym poi satia haduh ka shnong Maweit bad na ka jingjngai kaba 36 kilomitar ka sorkar MDA I ka la mang pisa pynbha bad siang rong tang ha ka jingjngai kaba 23 kilomitar.
Ha kane ka kynti pat lyngba ka jingtrei shitom jong u bah Methodius Dkhar MLA ka thaiñ, u la lah ban pynïoh biang ïa ka mang pisa kaba 63 klur tam na ka bynta ban bteng ïa ka jingpynbha bad siang rong na ka 23 kilomitar shaduh ka 36 kilomitar kaba poi haduh shnong Maweit.
Utei u nongmihkhmat u la pynshai paitbah ha ka sngi palei jong ka taïew ba la dep ha ka jingwan ïakynduh ïa ki paitbah nongkyrshan ha Riangdo. Ha katei ka sngi utei u nongmihkhmat u la ong ruh ba kumba u la kular ha ki por ïalap Election, ba un peit ïa ka jingeh ki paitbah khamtam ïa ki lynti syngkieng bad ki syrok kiba dei u budlum jong ka ïoh ka kot bad ka kamai kajih, u la pyrshang katba kot la ka bor ban leh ïa kata.
Ha kaba ïadei bad ka koit ka khiah kumba ki paitbah ka thaiñ Maweit ki la ju pynkynmaw, utei u nongmihkhmat u la ong ba u la pyrshang ban ïakren bad ka sorkar ba ka dei ban pynurlong noh ïa ka jingangnud jong ki paitbah ka thaiñ Maweit, ban pynbiang ïa ka jaka sumar kaba la don lypa ha ka thaiñ.
Na ka bynta katei ka jaka sumar utei u nongmihkhmat u la pynshai ba ha ka jingleit ïakynduh jong u ïa ki heh sorkar, ki la kular skhem ba ïa ka Maweit PHC yn sa kyntiew kyrdan noh sha ka CHC bad wat la ka sorkar kam pat mang pisa. Hynrei, un ym shongthait ban pynkynmaw ba ka dei ban pynkloi katba lah bad ha kine ki snem ban wan, ym don jingartatien ba ka sorkar kan sa kyntiew kyrdan noh ïka Maweit PHC sha ka CHC.
Nalor ki kam pynroi ha ka thaiñ Maweit, kiwei pat ki skhim ba u la pynïoh na ka sorkar ki long ka mang pisa na ka bynta ban shna ïa ka surok thymmai na Nongdaju shaduh Dorangre, ban shna ïa ki jingkieng ha ka surok na Shallang sha Riangdim bad bun kiwei kiwei pat ki skhim bad tang hapoh shibnai shiteng ba u long MLA, ki skhim kiba u la pynïoh hapoh ka constituency ka la kot sha ka 75 klur tyngka tam.
Nalor kata u la pynshai ruh sha ki paitbah ba na ka liang u bah Shakliar Warjri u ba bat kum u Myntri ka tnad Sport, u la kular ba un ïaleh shitom katba lah ban pynïoh kawei ka Stadium ha poh ka Mawshynrut constituency na ka bynta ba ki samla kin ïoh ban pyndonkam ha ki kam ïalehkai sport.
Utei u nongmihkhmat ha katei ka sngi u la pynshai paitbah ruh ha kaba ïadei bad ka jingleit kyrshan jong ki ar ngut ki MLA ka HSPDP ïa ka NPP, kata ma u bad u bah Sahakliar Warjri ba ki paitbah ki la pynjop ïa u kum u MLA. Na ka liang jong ki bad kiwei pat ki MLA jong ki party riew lum ba kynthup ïa ka UDP, PDF, VPP, ki leit kyrshan namar ka UDP ka jop tang 11 ngut, ka VPP 4 ngut, HSPDP 2 ngut, PDF 2 ngut.
U la ong ba bun ki paitbah ki sngewthuh bakla bad ki kynnoh ruh ba ka HSPDP ka la shet kylla ïa ki paitbah, hynrei kim sngewthuh pat ba wat lada ki saw ngut ki MLA ka Congress kin wan ïasynrop lang ruh ym pat lah ban thaw sorkar. Namar ka jingdon ki MLA ka dang long tang don tang 23 lada wan ïasoh sa uwei u kyrtong shimet jong ka Rambrai Jyrngam ruh dang tang 24. Lada wan ïasoh sa ki san ngut ki MLA ka TMC ruh dang tang 29 ngut bad kin ym lah ban thaw sorkar da lei lei. Kumta kim banse ban leit kyrshan noh ïa ka NPP kaba bun pait tam ha ka jingdon ki MLA ban ïoh thaw ïa ka sorkar.
Ha kaba ïadei bad ka jingbym sngewthuh bad ka jingshah ïalam bakla jong ki paitbah ba ki ar ngut ki MLA ka HSPDP ki la leit rung sha ka NPP, kam long kaba shisha. Ki MLA ka HSPDP ki leit tang ban kyrshan ha ka ban thaw ïa ka sorkar, hynrei kim shym rung party satia sha ka NPP. U la pynshai ruh ba ki paitbah kim dei ban shah ïalam bakla namar lada ki ngeit ïa ki nongpynsngewthuh bakla, ka jingduhnong ka dei ïa ki paitbah ka Constituency baroh kawei.