Mawkyrwat, Ïaïong, 22: Hadien ka jingiehnohkam u bah J.C. Diengngan kum u President jong ka Meghalaya Mining Owners & Exporters Association da kaba u la leit ban thaw thymmai noh da kawei pat ka kynhun ki nongkhaïi dewïong, ka Meghalaya Mining Owners & Exporters Association ha ka 20 tarik u Ïaïong, 2023 ka la ïoh ban pynlong ka jingïalang paidbah ha shnong Nongjri, South West Khasi Hills District ban ïa pyrkhat ïa kiba bun ki kam bad ïoh ban pynkhamti ruh ïa ki nongkitkam ba thymmai jong ka MMO&EA.
Ha kane Ka jingjied nongkitkam thymmai jong ka MMO&EA la ïoh President da u bah Mighter N. Marweiñ bad General Secretary u bah P.K. Nongmin ha ryngkat bad kiwei de ki dkhot ba ha khmat jong ka MMO&EA.
Ha kane ka sngi na ka liang u bah Mighter N. Marweiñ u la pynshai ruh ha ki lad pathai khubor ha kaba ïa dei bad ka MMO&EA bad kumjuh ruh halor ka jingmih sa kawei pat ka seng kaba seng thymmai ba la tip kum ka South West Khasi Hills District Mine Owners and Exporters Association (SWKHDMO&EA) jong ki nongkhaïi dewïong ha ka thaiñ Nongjri, South West Khasi Hills District.
U bah Mighter N. Marwein u la ong ruh ba halor ka jingpynmih khubor u bah J.C. Diengngan ba kum ka seng ka don ïa kita ki kyndon ba ym shah ban ïa shimbynta ha ki kam politik, balei u bah J.C. Diengngan um iehnoh shwa ïa ka jinglong kum u dkhot jong ka seng ha shwa ba un thaw pat da kawei pat ka seng haba ïa lade u don bynta ba ai jingkyrshan ïa ka UDP hapoh jong Ka Ranikor Constituency, buh jingkylli u bah Mighter ïa u bah J.C. Diengngan.
Ula ong shuh shuh ba kum ki dkhot bad kiwei de ki nongkhaïi kim kwah ban leit ïa snohkti lang bad katei ka seng thymmai da ka jingïarai lang ba ngin ïai neh bad ka Meghalaya Mining Owners and Exporters Association (MMO&EA) nanka bynta ban pyntyllun ïa ki kam khaïi pateng ha kane ka dong ka thaiñ hi baroh kawei.
Ïa kane ka jingïalang paidbah la pynlong ha ïing Dorbar jong ka Kur Nongtnger ha Shnong Nongjri, South West Khasi Hills District ha ka jingïadon ryngkat lang kiwei de ki dkhot bad ki nongkitkam thymmai jong kane ka MMO&EA.
