Nongpoh, Ïaiong, 16: Ka Nomiwell Memorial Secondary School kaba dei ka skul kaba peit bad khmih da ka Dorbar Raid Nongpoh, mynta ka sngi ka la pynlong ïa ka program kaba kyrpang ban pyndon burom ïa ki khynnah pule kiba pass bha bad wan sha khmat ha ka examin SSLC lyngba ka result kaba la pynmih daka MBOSE dang shen.
Kane ka shlem ai jinghikai ka ba dei ruh ka skul jong ka Raid Nongpoh ha ka jingpeit jingkhmih lang ka Shnong ka la phah 5 ngut ïa ki khynnah ban ïaleh ïa eksamin SSLC bad baroh 5 ngut ki pass bha bad ki la ïoh ïa u soh u ba thiang lyngba ka jingtreishitom bad ka jingkyrshan lang ki nonghikai.
Napdeng ki 5 ngut, ka samla Sildamon Suting kaba sah ha ki jaka ri khun swet Govt. Girls Home ka la ïoh haduh 78.50% bad ïoh distinction ha ki 4 tylli ki Subject kata ha ka English, Khasi, Science bad ka Health Education.
Ha ka jingleh donburom ïa kitei ki khynnah pule, la ïa donlang da u bah Linus Lyngdoh kum u Chairman ka School Managing Committee, kong Evangeline Syiem, Principal ki nonghikai lem bad ki khynnah skul.
Haba kren ha ka jingïalang, u bah Linus Lyngdoh Chairman ka SMC bad ba dei ruh u Lyngdoh ka Raid Nongpoh u la ai khublei kyrpang ïa kitei ki 5 ngut kiba la lah ban ïalehbha ha ki eksamin SSLC bad u la ong kane ka jinglah jong kitei ki 5 ngut ban pass bha ka la kyntiew ïa ka nam ym tang jong ka skul hynrei ïa ka Raid hi baroh kawei.
