Nongstoiñ, Rymphang 10: Ka elekshon ban jied ïa ki nongmihkhmat sha ka Ïngdorbar Thawaiñ ka jylla ka sah satang 26 sngi thik bad baroh ki kyrtong jong ki sengs aiñ pyrthei ki la ïashut bha ïa ki jabieng jong ki bad kren ha ki jingïalang hapoh la ki jong ki jong ki constituency. Hynrei, ka Hynñiewtrep Integrated Territorial Council, ka la ïeng rangbah jraiñ ban pynshai paitbah kumno ban jied ïa ki nongmihkhmat.
Ha ka sngi thohdieng, ka HITO Mawshynrut circle ka la pynlong da ka jingpynshai paitbah hakhmat ïew Riangdo halor katei ka phang ban jied ïa ki nongmihkhmat. Ha ka jingïalang ba la pynïaid da u samla Personal Myrthong la ïadon ryngkat da u bad Donbok Dkhar President ka sengkmie na Shillong, u vice president bad kiwei pat ki para nongïalam.
Ha ka jingpynshai paitbah u bah Donbok Dkhar u la ong ba ka seng kam don kano kano ka jingïashah liang ïa kano kano ka party, hynrei ka thong ba hakhmat ka long ban pynsngewthuh sha ki paitbah ba ki dei ban jied ïa ki nongmihkhmat kiba nang ba stad, kiba lah ban thaw aiñ ym ban jied ïa ki noongmihkhmat ki ban leit shong ha Assembly hynrei kim don por ne kim sngewthuh kumno ban thaw aiñ.
U la ong ruh ba kaba sngewsih ka long ba kiba bun ki nongmihkhmat haba ki la jop ki la bun kam ha kaba sam shawla, sam blanket, sam sniang, sam syiar bad ki da kop ruh ba ki skhim ba ki wanrah sha ki paitbah, ka dei ka jong ki bad kumno keiñ kim lehraiñ haba kim shym la sei na ka pla, hynrei ka dei kaba la ai da ka sorkar bad ka dei ka hok ba ki paitbah ki dei ban ïoh.
Utei u nongïalam ka seng u la ong ruh ba ki paitbah jong ka Mawshynrut ki la dei ban sngewthuh ïa kaei kaba ki la mad ha kine ki san snem, ba haduh katno ka jingsohsat ha baroh ki liang ha ka jingsynshar jong kane ka sorkar MDA. U la pynshai ruh ba haba don ki jingiatyngkhuh hapdeng ki Khasi bad ki pulit Assam, ki pulit jong ka Meghalaya kim ju nud ban pynphai kylla, namar ba ha ka jingpynïaid ïa ka rukom trei kam ki dang hap ban bud ïa ka Assam Police Manual Act, kaba baroh ki tip kum ka Joint Cadre.
Ïa kane ym lah ban len ba ïa u heh duh ki pulit ha ka jylla u ba la tip kum u Director General of Police (DGP), ka sorkar Meghalaya ka dang hap ban thung da u ba na ka jylla Assam. Dei halor katei ka nongrim ba ki pulit ka Assam ki nud ban leh katba mon wat ban siat ïap ïa ki nong Meghalaya ruh kumba ka la jia ha Langpih bad ha Mukroh.
Utei u nongïalam ka seng u la ong ba ki paitbah kim dei ban shah pynbiej ha ki sbai rupa jong ki kyrtong kiba wan pynbiej ïa ki da ka san hajar, shiphew hajar bad da kaba kular da kumne da kumtai, hynrei ki dei ban peit bad bishar u ba kum uno u briew ki dei ban jied. U la ong ruh ba ha kane ka 2023 lada synshar da kano kano ka sorkar ruh, ka HITO kan ym ïashah satia hynrei kan ïeng pyrshah beit lada kam lah ban pyntrei kam ïa ki mat ba ka seng ka angnud.
