Nongstoiñ, Rymphang, 10: U Bhupendra S Chaudhary, IAS General Observer bad Dr Sunil N Ranote, IRS Expenditure Observer ka West Khasi Hills District, mynta ka sngi ka 10 tarik u Rymphang 2023, ki la pynlong ïa ka jingïakynduh lang ïa baroh ki nongmihkhmat jong ki Political Party jong ki lai tylli ki constituency ka District, ha ka jingdon ryngkat u District Election Officer bah Garod LSN Dykes, ki RO, ARO, AERO bad kiwei kiwei ha Conference Hall DC’s office, Nongstoiñ.
Ka meeting hapoh ka jingpynïaid jong u DEO ki la ïatai sani bha shaphang ki aiñ bad ki kyndon ha kaba ïadei bad ki jingpynlut pynsep da ki kyrtong ha ka por election. U bah H.K Thabah u nodal officer ka District Election Monitoring Committee bad RO 34-Mawshynrut (ST) Assembly Constituency lyngba ka power point presentation, u la batai bniah ïa bun jait ki jingpynlut pynsep la ka long ki jingpynlut ha ki kali, ki shuki, ki tiar pynsawa bad kiwei kiwei ïa ka ban pyndonkam da ki kyrtong ha ki campaign, ki rally, ki meeting bad kumta ter ter.
Katba ka kong D.Kharshiïing RO 33-Rambrai Jyrngam ka la pynkynmaw ha kane ka jingïalang ïa ki jingpynlut pynsep beaiñ, ha kaba ka la mana ba ka aiñ kan ym map ïa kino kino ki political party ne kyrtong lada lap bad ban pyshitom da kaba daiñ kuna ne set phatok.
Kum ka jingïakynduh lang u Expenditure bad General Observer, ki la kyrpad bad kyntu kynpham ïa baroh ki political party, ba kin bud pyrkhing ïa ki aiñ bad ki kyndon jong ka Election, da kaba kiar na kino kino ki jingpynwit bad pynthut bad pynkut da kaba ai khublei ïa baroh ki kyrtong. Ïa ka meeting la pynkut da ka jingai khublei na u bah R Kharkongor MCS EAC, Nongstoiñ.
