7 ngut na ka Mawkyrwat bad 9 ngut na ka Ranikor Constituency kin sa ïakhun ha ka MLA Election 2023
Mawkyrwat, Rymphang, 10: Ka jingpynkhreh na ka bynta ka MLE Election jong mynta u snem 2023 ka la nang ïaid shakhmat ha kaba baroh ki kyrtong na ki ar tylli ki konstitwensi kata na ka 36 – Mawkyrwat bad na ka 35 – Ranikor ki la ïoh ban pyndep ïa ki jingthep kyrteng ha ka 7 tarik u Rymphang, 2023 bad ha ka 8 tarik u Rymphang, 2023 pat la pyndep ïa ka jingpeit bniah ïa ki kot ki sla ne ka scrutiny hapoh ka Multipurpose Hall DC’s, Office, Laitlawsang, South West Khasi Hills District.
Lah ban kdew ruh ba ka tarik ba khadduh ban rai ïa baroh ki kyrtong la kin ïa khun ne kin kynrandien noh ka dei mynta ka sngi ka 10 tarik u Rymphang, 2023 hynrei haduh kane ka sngi bad ki kynta ba la buh, baroh ki 16 ngut ki kyrtong na ki ar tylli ki konstitwensi kata na ka Mawkyrwat bad Ranikor Constituency kim shym la don wat uwei ruh uba la shah weng hynrei baroh ki long ki kyrtong kiba biang.
Ki 7 ngut ki kyrtong na ka 36 – Mawkyrwat Constituency ki kynthup u bah Carnes Sohshang na ka Indian National Congress (INC), u bah H. Stalyne Diengdoh na ka National People’s Party (NPP), u bah Medalsing Lyngdoh na ka Hills State People’s Democratic Party (HSPDP), u bah Renikton Lyngdoh Tongkhar na ka United Democratic Party (UDP), u bah Sounder Strong Cajee na ka All Meghalaya Trinamool Congress Party (AMTC), ka kong Bity Jyrwa na ka Bharat Janata Party (BJP) bad u bah Pynskhemlang Wahlang kum u kyrtong shimet.
Nangta ki 9 ngut ki kyrtong na ka 35 – Ranikor Constituency ki long u bah Pius Marweiñ na ka United Democratic Party (UDP), ka kong Victorealness Syiemlieh na ka Indian National Congress (INC), u Martin M. Danggo na ka Bharat Janata Party (BJP), u bah Overlin Imiong na ka Voice of People’s Party (VPP), u Tengsim G. Momin na ka All Meghalaya Trinamool Congress Party (AMTC), u bah Mighter Marweiñ, u Krenath Marak, u Bichitro Hajong bad u bah Savio Phrangsngi Dkhar ki long kum ki kyrtong shimet kiba la pynkhreh bha ban aireng ha kane ka kynti na ki constituency.