Shillong, Jymmang 22: U Bah Ardent Miller Basaïawmoit, President ka VPP un sdang ka jingshah thngan khlem naduh ka sngi ba ar naduh ka por 10 baje mynsytep hakhmat Secretariat.
Kane ka rai ban shah thngan u MLA ka Nongkrem, ka long hadien ba ka All Party Meeting ba la khot da u Myntri Rangbah ka jylla, u Conrad Sangma ha ka 19 tarik mynta u bnai kam shym treh ban ïakren halor ka jingdawa ban review nih ïa ka Reservation Policy.
Kane ka rai kadei kaba la shim da ka Seng ban pah shuwa tang ïa u Nongïalam ba rangbah duh jong ka Seng kum ka jingsdang jong ka jingïakhih kaba kham tyngeh. Hynrei la ïoh khubor ba kin don ki paidbah bad ki nongïalam jong ka Party kiba lah ban leit synran lang ïa u President ha kane ka jingleit shong shah thngan jong u hakhmat ka Shlem treikam ba heh duh jong ka sorkar Meghalaya.
