Mynta yn leit ai jing thoh ka VPP sha u CM,maham ïa kiba pynkulmar

Shillong, Jymmang 11: Ki Saw ngut ki MLA jong ka Seng Voice of the People Party (VPP) kin leit rah jingthoh ha u Myntri Rangbah, u Conrad Sangma ha ka sngi Palei ban dawa ba dei ban pynsangeh shuwa ïa ka jingkhot pynrung kam katba ym pat dep pynbeit thymmai shuwa ïa ka Reservation Policy.
Baroh saw ngut ki MLA, u Bah Ardent Basaïawmoit, u Bah Adelbert Nongrum, Bah Brightstarwell Marbañiang bad Bah Heaving Stone Kharpran kin leit rah ïa kane ka jingthoh. Na ka liang la sngewthuh ba kan dawa ruh na ka sorkar ban pynlong ïa ka dorbar ba kyrpang ban ïakren ïa ka Roster System kaba la shu pyntreikam beit naduh ba sdang pyntreikam ïa ka Reservation Policy bad kaba la ktah jur ïa ki Samla wadkam wadjam.
Na ka liang ka Party ka ladep ban pynkhreh ïa kane ka jingthoh kaba lehse kaba kynthup ruh ïa kiwei kiwei ki jingdawa kum ka jingdawa ban thung da ka Komiti kyrpang ban jurip bniah bha ïa kane ka Polisi bhah kam.
Ka Party kan leit ïakynduh ïa u Myntri Rangbah ha ka por 2 baje janmiet bad ka la wer ïa ki paidbah ban ïaleit synran lang da kaba ïakynduh lang ha ka por 1 baje mynsngi ha jaka sangeh kali hajan Additional Secretariat kum ka dak ba kane ka jingdawa kam dei tang ka jingdawa jong ka Party, hynrei kadei ka jingdawa hi jong u paidbah.
Lah ban kdew hangne ba ka VPP ka la leit pynlong jingïalang ha Mawlai, Jaïaw, Jowai, Nongpoh, Nongstoiñ bad Mawkyrwat ban pynshai paidbah halor ka jingdonkam ban pynthymmai noh ïa ka Reservation Policy bad ka jingbuh por da kawei ban pyntreikam ïa ka Roster System.
Ha kajuh ka por ka Seng ka kyntu ïa baroh kito kiba wan sha kane ka jingleit synran ba kin long kiba jai jai bad ym bit satia ba thaw kino kino ki jingpynkulmar, da kaba ong ba kane ka jingdawa kam dei satia ka jingïaleh pyrshah badno badno ne bad kano kano ka jaidbynriew, kadei beit ka jingdawa na ka sorkar na ka bynta ka jingmyntoi jong ki khun Samla. Ka Seng ka maham ruh ba kino kino kiba thaw jingkulmar kin hap ban kitkhlieh hi dalade.